Mesolìticu

Montes, panorama cara a su Supramonte de Ulìana. Foto de Antonello Chiaramida, 2008, de Sardigna DigitalLibrary

Su tèrmine Mesolìticu est cumpostu dae sas paràulas gregas "mesos", mesanas, e "lithos", pedra, e designat s'Edade de sa Pedra intermèdia intre cudda Antiga e cudda Noa.
S'achirimentu sientìficu de s'esistèntzia de evidèntzias archeològicas interpretabili comente a "intermèdias" intre cuddas de sos cumplessos de su Paleolìticu e sos de su sutzessivu Neolìticu est frutu de sas chircas archeològicas giutas in su cursu de su sèculu XX.
Como su tèrmine "Mesolìticu" designat su perìodu (duradu unos cantos millènnios) in cales at tentu logu su protzessu de adatamentu de sos ùrtimos grupos de cassadores-regollidores a sos cambiamentos ambientales averguados #si partinde dae unos 10.000 annos a oe.
Unos cantos istudiosos preferint scomporre custu perìodu in duas fases e impreare de cunsighèntzia duos tèrmines. Su tèrmine "Epipaleolìticu" diat designare una fase prus antiga, in prus forte continuidade cun su Paleolìticu superiore, mentras su tèrmine "Mesolìticu" diat fàghere riferimentu a una fase cronològica prus tarda, in cale prus ladinas aparint sos sinnos de su protzessu de "neolitizzazione", est a nàrrere de su protzessu de transitzione cara a sos sistemas econòmicos e sotziales basados subra laurera e allevamentu.
Pro cantu pertocat sa Sardigna, a s'istadu atuale de sos connoschimentos, non parent rilevabili atestatziones archeològicas relativas a custa fase cronològica.
S'ùnica etzetzione diat pòdere èssere rapresentada dae a su mancu una parte de sos rinvenimentos acontèssidos in su cursu de iscavos sientìficos in sa gruta Corbeddu de Ulìana, sa cale datatzione bàntzigat intre sos 20.000 e sos 6.000 annos a.C., torrende duncas siat in su Paleolìticu superiore siat in su Mesolìticu.