Mesolìticu

Su tèrmine Mesolìticu, cumpostu dae sas paràulas gregas mesos (mesanas) e lithos (pedra) designat s'Edade de sa Pedra intermèdia intre cudda Antiga e cudda Noa, unu perìodu duradu unos cantos millènnios in cales at tentu logu su protzessu de adatamentu de sos ùrtimos grupos de cassadores-regollidores a sos cambiamentos ambientales averguados #si partinde dae unos 10.000 annos a oe.

Unos cantos istudiosos preferint scomporre custu perìodu in duas fases: Epipaleolìticu, una fase prus antiga in continuidade cun su Paleolìticu superiore, e Mesolìticu cun riferimentu a una fase cronològica prus tarda in cale si manifestant prus ladinas sos sinnos de su protzessu de neolitizzazione est a nàrrere de su protzessu de transitzione cara a sos sistemas econòmicos e sotziales basados subra laurera e allevamentu.

A s'istadu atuale de sos connoschimentos, pro cantu pertocat sa Sardigna, non parent rilevabili atestatziones archeològicas ascrivibili a custa fase cronològica. S'ùnica etzetzione diat pòdere èssere rapresentada dae una parte de sos rinvenimentos de sa gruta Corbeddu de Ulìana, sa cale datatzione bàntzigat intre sos 20.000 e sos 6.000 annos a in antis Cristu, chi podent èssere collocados siat in su Paleolìticu superiore chi in su Mesolìticu.

Aggiornamento

25/10/2023 - 14:53