Kryn Taconis

Casteddu. Fotografia de Kryn Taconis, 1956

In sos primos annos Quaranta, a pustis de una cùrtzia parèntesi comente a cineoperatore, Kryn Taconis (Rotterdam 1918 – Toronto 1979) cumintzat a s'ocupare de fotografia, in antis comente a dischente de Paul Guermonprez e posca comente a tècnicu de càmera iscura in Amsterdam.
In su cursu de sa Segunda Gherra Mundiale òpera comente a giornalista freelance e fotògrafa in manera segreta s'ocupatzione tedesca de s'Olanda. Intrat a fàghere parte in prus de su movimentu "Underground Càmera", chi aiat individuadu in sa fotografia una forma de resistèntzia.
In su 1946 partas pro sos Istados Unidos, ue tenet sos primos cuntatos cun sa rivista "Life", de sa cale duos annos a pustis at a èssere chi currispondet pro su Benelux.
A sa fine de sos annos Quaranta s'istabilit a Parigi e cumintzat a collaborare cun sa Magnum Photos, devenende·nde membru in su 1954. Duos annos a pustis, imbiadu dae s'agèntzia parigina in Sardigna, faghet una quarantina de iscatos intre su portu e sos mercados de Casteddu, sa professone de Santu Efisio cara a Pula, sas bias de Orgòsolo e unos cantos tzentros de su Tataresu.
In su 1957, in Algeria documentat in manera clandestina sa faina de su Fronte de Liberatzione Natzionale (s'esèrtzitu rivolutzionàriu algerinu) contra sos colonialistas frantzesos. Custu importante documentàriu, tzensuradu deretu de sa Magnum chi non cheriat tènnere cuntrastos cun su guvernu frantzesu, at a èssere publicadu apustis mortu petzi a sa fine de sos annos Setanta.
A pustis de una cùrtzia permanèntzia in Bruxelles, in su 1959 si trasferit de su totu a Canadà, ue, acabadu s'annu sutzessivu sa cungrega cun sa Magnum, sighit sa faina sua de freelance.
In su cursu de sos annos Sessanta realizat unos cantos documentàrios pro contu de su guvernu canadesu e in sa dècada sutzessiva insinnat fotografia a Kitchener, in s'Ontario.
In su 1989, sos National Archives of Canadà li dèdicant una mustra retrospetiva de su tìtulu "Photojournalist".