Paleolìticu mèdiu

Costas Durgali. Foto de colletzione: Marinas e costas de sa Sardigna, de Sardigna DigitalLibrary

S'eventu chi signat s'intrada in su Paleolìticu mèdiu est sa cumparta de su gai naradu òmine de Neanderthal, sos cales restos scheletrici, riferibili a in prus de 300 indivìduos atzapados in Europa meridionale e tzentrale e in su Serente e Mèdiu Oriente, sunt istados incuadrados in cronologia a su belle intre sos 130.000 e sos 35.000 annos a oe. Pro cantu pertocat sa Sardigna, a s'istadu atuale de sas chircas non si tenent rastros seguros de sa presèntzia umana in s'ìsula riferibili a su Paleolìticu mèdiu.Sos ùnicos indìtzios nòdidos acudint dae sos duos acatamentos (in sa gruta de Ziu Santòru e in sa gruta de Cala Ilùne, subra de sa costa de Durgali) de frustoli de carbone atzapados in assòtziu cun ossos de cherbu brusiadas ma sena calicunu trastu dae pedra ne ossos umanos. Si tratat, comente si siat, de indìtzios meda labili. S'ausèntzia de rastros archeològicos prus cunsistentes e seguras de atribuire a su Paleolìticu mèdiu diat pòdere èssere in manera simpre una farta in sos connoschimentos nostros e no un'efetivu istadu de sas cosas.

Aggiornamento

18/7/2025 - 12:32