Sa conchista aragonesa

Aritzo, prigioni spagnole “Sa Bovida”, esterno. Foto di Irene Ollargiu, 2007, da Risorse digitali Sardegna

In su 1297 su paba Bonifàtziu VIII aiat istituidu ex novo su "Regnum Sardiniae et Corsicae" afeende·lu a su soberanu de Aragona Giagu II. Sa conchista territoriale de sa Sardigna tenet cumintzu però petzi in su 1323 cun s'isbarcu de s'esèrtzitu aragonesu, cumandadu dae su piseddu Alfonso, in su golfu de Palma de Surcis. S'ocupatzione de su territòriu acontesset cun lentezza, ma capillarmente.
In su 1324 est conchistada Villa de Crèsia (posca Igrèsias) e in su 1326 Casteddu. Partinde dae custa data e finas a su 1479, annu in cale sos soberanos Ferrante de Aragona e Isabella de Castìllia costituint sa Corona de Ispagna, s'ìsula est in manera graduale insertada in un'àrea culturale, in prus de chi geogràfica, diferente de su pretzedente cuntestu, caraterizadu dae sa contrapositzione intre sos giuigados autòctonos e sas repùblicas marinare de Pisa e Gènova.
S'assentu amministrativu de su territòriu, chi torraiat in unu prus ampru disinnu de restruturatzione sotzioeconòmica, subit radicales mudadas, in primu logu sa ripartizione in feos agabbados a cumpensare sos nòbiles catalanos chi aiant partetzipadu a sa conchista. Sas grandu tzitades sunt sutapostas a s'autoridade règia e retzint sos matessi mandos de Bartzellona.
Su pranu est impedidu dae sa resistèntzia oposta dae sos feudatàrios presentes in antis de sa conchista (sos Dòria e sos Malaspina) e de su giuigadu de Arbaree, ùnicu rennu autòctonu sardu subravìvidu finas a su 1410.
S'interrumpet in tale modu su filu diretu chi congiunghiat sa Sardigna a sa penìsula italiana e, puru no iscumparende de su totu sos produtos toscanos e lìgures, sas currentes de tràficu intre Catalugna e Sardigna determinant su de si cunfigurare de assentos noos sotzioculturales. Sunt acollidos su lèssicu catalanu e sas espressiones artìsticas, in particulare sas fòrmulas gòticu-catalanas chi s'ant a raighinare in su gustu isolanu meda de bènnere repropostas finas a su Seschentos.

Aggiornamento

5/8/2025 - 14:37