Carlo Bavagnoli

Costantino Nivola a sa festa in ocasione de sa mustra in Orane. Fotografia de Carlo Bavagnoli, martzu 1958

Carlo Bavagnoli est nàschidu in Piacenza in su 1932. Acabados sos istùdios clàssicos, in su 1951 at frequentadu sa facultade de Giurisprudèntzia de Milano. In Brera at tentu manera de si confrontare cun carchi giòvanos fotografos: Alfa Castaldi, Mario Dondero e Ugo Mulas. In su 1955, trasferidu in manera definitiva a Milano, at incumintzadu a collaborare cun sas revistas Illustrazione Italiana, Tempo illustrato e Cinema Nuovo. Assumidu comente fotografo dae Epoca, in su 1956 est istadu trasferidu in sa redatzione romana de sa revista. In sa capitale at incumintzadu unu traballu longu de documentatzione de su quartiere populare de Trastevere, gràtzias a su cale at otentu sos primos contatos cun sa revista americana Life, chi li at publicadu carchi fotografia.
In martzu de su 1958 est arribadu pro sa prima borta in Sardigna, a Orani, in ue pro sa matessi testada at fotografadu Costantino Nivola durante sa decoratzione de sa fatzada de sa cresia de sa Madonna d'Itria e sa mostra de isculturas allestida in sas bias de su bidda.
S'annu imbeniente at passadu unu mese in New York, in ue ancora Life li at pedidu, pro finalidade formativa, sa realizatzione de unu reportage subra sa vida de sa metròpoli; duos annos a pustis li est istadu ofertu unu cuntratu comente corrispondente dae s'Itàlia. In sos annos imbenientes at traballadu comente free lance pro diversos giornales.
Intre su 1960 e su 1961 est torradu in Sardigna, a Loculi e Irgoli, imbiadu dae L'Espresso pro unu servìtziu subra sa pobresa in Itàlia, chi non est istadu publicadu ca retentu non abbastanza dramàticu.
In sos annos imbenientes sos viàgios intre s'Itàlia e sos Istados Unidos si sunt intensificados. Pro Life at documentadu s'abertura de su Cuncìliu Vaticanu II, sa morte de Giovanni XXIII e s'eletzione de Paolo VI. In su mentras, at sighidu sa collaboratzione sua cun Epoca. Su 1964 est istadu unu annu memoràbile pro s'atividade sua: assumidu in sa redatzione americana de Life, fatu ùnicu pro unu fotografo italianu; a pustis de unu annu passadu in New York, est istadu trasferidu a sa sede de Parigi. Dae su 1972, annu in ue at cessadu sa publicatzione de sa revista americana, at intensificadu sos rientros suos in Itàlia, at publicadu numerosos libros fotogràficos, at realizadu vàrios documentàrios pro sa televisione e si est ocupadu de mùsica clàssica.

Bibliografia
Carlo Bavagnoli. Costantino Nivola. Ritorno a Itaca. Nuoro, Ilisso, 2010.
Carlo Bavagnoli. Sardegna 1959, l'Africa in casa. Nuoro, Ilisso, 2010.

Aggiornamento

7/9/2026 - 18:02