Carlo Bavagnoli

Costantino Nivola a sa festa in ocasione de sa mustra in Orane. Fotografia de Carlo Bavagnoli, martzu 1958

Carlo Bavagnoli naschet in Piacenza in su 1932. Cumpletados sos istùdios clàssicos, in su 1951 s'iscriet a sa facultade de giurisprudèntzia de Milanu. A Brera tenet modu de si cunfrontare cun unos cantos giòvanos fotògrafos, Alfa Castaldi, Mario Dondero e Ugo Mulas. In su 1955, aende·si trasferidu de su totu a Milanu, cumintzat a collaborare cun "Illustratzione Italiana", "Tempus incraridu" e "Tzìnema Nou".
Assùmidu comente fotògrafu de "Època", in su '56 est trasferidu a sa redatzione romana de sa rivista. In sa capitale cumintzat unu longu traballu de documentatzione de su bighinadu populare de Trastevere, gràtzias a su cale otenet sos primos cuntatos cun sa rivista americana "Life", chi li pùblicat unas cantas foto.
In su martzu de su 1958 est pro sa prima bia in Sardigna, a Orane, ue pro sa matessi testada fotògrafa Costantino Nivola durante sa decoradura de sa fatzada de sa crèsia de sa Madonna de Itria e sa mustra de isculturas ammaniada in sas bias de su paisu.
S'annu sutzessivu colat unu mese in New York, ue ancora "Life", li recheret, a fine formativa, sa realizatzione de unu documentàriu subra de sa vida de sa metròpoli; duos annos a pustis de l'oferit unu cuntratu comente a chi currispondet de s'Itàlia. In sos annos sutzessivos at a traballare comente a free lance pro diversos giornales.
Intre su 1960 e su 1961 torrat a Sardigna, a Loculi e Irgoli, imbiadu dae "S'Espressu" pro unu servìtziu subra de sa poberesa in Itàlia, chi no at a èssere publicadu in cantu retentu non bastante drammàticu. Aiat prefertu, difatis, evitare sa retòrica e sas fortzaduras ideològicas chi in cuddos annos accaniant in sas pàginas de cuotidianos e rivistas.
In sos annos sighentes sos biàgios intre s'Itàlia e sos Istados Unidos s'intensificant. Pro "Life" documentat s'abertura de su Cuntzìliu Vaticanu II, sa morte de Giuanne XXIII e s'eletzione de Pàule VI. In tantu sighit sa collaboratzione sua cun "Època".
Su 1964 est un'annu memoràbile pro sa faina sua: est assùmidu in sa redatzione americana de "Life", fatu ùnicu pro unu fotògrafu italianu; a pustis de un'annu coladu a New York, est trasferidu a sa sede de Parigi.
Dae su 1972, annu in cale sessat sa publicatzione de sa rivista americana, intensificat sas torradas suas in Itàlia, pùblica numerosos libros fotogràficos, realizat vàrios documentàrios pro sa televisione e s'òcupat de mùsica clàssica.