Werner Bischof

Retratu de fèmina chi giughet unu paniere subra de su capu. Fotografia de Werner Bischof, 1950

Werner Bischof est nàschidu in abrile de su 1916 in Zurigu. Sighende s’inclinatzione sua pro sa pintura, at frequentadu pro unu annu unu cursu de disinnu in Schiers. Non satisfatu, in su 1934 at frequentadu su cursu de fotografia, leadu dae Hans Finsler, in s’iscola de artes aplicadas de Zurigu. Ispecializadu in su still-life e otenidu su diploma in su 1936, at aviadu unu laboratòriu de fotografia e gràfica pro manifestos e revistas; duos annos a pustis est istadu assùmidu dae sos editores Amstutz & Herdeg. In ocasione de s’Espositzione natzionale svìtzera de su 1939, at progetadu s’allestimentu de su padiglione de sas artes gràficas e at colaboradu a sa realizatzione de cussu de sa moda. A s’isclatare de su segundu cunflitu mundiale, a pustis de unu curtzu istare in Parigi, s’est arruoladu in s’esèrtzitu svìtzeru, fagende fintzas sa funtzione de reporter de gherra. Custa esperièntzia li at permìtidu de valutare sa diferèntzia chi esistit intre sa fotografia in istùdiu, basada subra una pianificatzione atenta, e su fotoreportage, lestru in s’esecutzione e imprevedìbile in sas dinàmicas. At a ischèrere cust’ùrtimu, pro su cuntatu umanu e sa possibilidade de cunfrontu continuu cun su presente, sena però renuntziare a sa perfetzione tècnica maturada in su cursu de sa formatzione sua. In su mentras, at connòschidu Arnold Kübler, iscritore, òmine de teatru e caporedatore de sa revista de arte e cultura Du, e cun issu, intre su 1941 e su 1942, at instauradu unu raportu de colaboratzione duràbile. In su matessi tempus, at frequentadu sos ambientes de sas avantguàrdias artìsticas zurighesas aderende a su movimentu surrealista Allianz.
A partire dae su 1945, at colaboradu cun sas printzipales testadas internatzionales pro sas cales at realizadu importantes reportages in s’Europa martoriada dae sa gherra, intre sos cales unu dedicadu a sos italianos internados in Svìtzera. In su 1946 at atraversadu s’Itàlia fissende in sa pelìcula sas devastatziones e su malèssere generados dae annos de ostilidade, in particulare sa protesta de sos milanesos pro sa separatzione de Trieste dae s’Itàlia, sos subrabìvidos a sos campos de exterminiu natzistas in Trentino-Alto Àdige, sos asilos pro pipios òrfanos in Emìlia-Romagna, sas ruinas de s’abadia de Montecassino. In Rimini at connòschidu sa futura muzere Rossellina Mandel. In su 1948, at fotografadu pro Life sas Olimpiadas de Saint Moritz e s’annu sighente est istadu fatu membru de Magnum Photos. At sighidu a biagiare in s’Europa de su Norte e de s’Est, e in su 1950 est torradu in Itàlia, in ue at publicadu paritzos servìtzios in Epoca. In custa ocasione at fatu unas bìndighi fotografias fintzas in Sardigna documentende sa duretza e s’arretradura de sas conditziones de traballu in su Campidanu de Casteddu e in s’Iglesiente.
In su 1954 si est recadu a Pànama, in Cile e in Perù pro incàrrigu de Magnum, in ue, a trintaoto annos, at pèrdidu sa vida in unu incidente automobilìsticu in sa Cordillera de sas Andes.

Bibliografia
Sguardi forestieri. I grandi fotografi in Sardegna: Henry Cartier-Bresson, Bruno Barbey, Werner Bischof. Nuoro, Imago, 2008.
Werner Bischof in Sardegna, 1950. Nuoro, Imago-MAN, 2012.

Aggiornamento

8/9/2026 - 15:05