Sa gara campidanesa

Interessante e galanu a manera particulare est su mundu a inghìriu de sa poesia improvisada cramada "campidanesa".
Interessante e galanu a manera particulare est su mundu chi s'agatat a inghìriu de sa poesia improvisada cramada "campidanesa". Custa forma artìstica, connota oe petzi in carchi comuna de su Campidanu de Casteddu e de su Sulcis-Iglesiente, fintzas si paret chi tèngiat assimìgios medas cun cudda "logudoresa", est in realidade diferente. E sa diferèntzia no est in sa limba chi s'impreat.

In beridade sa gara campidanesa est unu giogu mètricu-poèticu de un'arte distinta e galana, mala a cumprèndere e a manigiare pro sa gente. Difatis, cunforma a su chi at iscritu s'etnomusicòlogu Pàulu Bravi, su pùblicu est cumpostu dae unu fiotu de amantiosos chi andant dae una bidda a s'àtera pro ascurtare sas garas. Custu fatu si depet a un'istòria conditzionada fintzas dae s'artifìtziu cumplicadu de su "mutetu a otu peis" chi benit impreadu belle semper dae sos artistas. Su mutetu si partzit in duos: "sa sterrina" e sa "cobertanza" chi sunt a manera diferente intritzadas intre issas. Su tema, "su fini", est semper tratadu in suspu e non depet èssere iscobiadu tropu a lestru, ca s'arriscat de no atzapare s'agradu de su pùblicu. A custa parte de sa gara li narant "sa cantada".

Sa segunda parte imbetzes si definit "versada" e si distinghet pro unu metru prus fàtzile. Bi sunt formas de acumpangiamentu corale e cun istrumentos a cordas. Sa natura sua etotu cumplicada, chi sos "profanos" belle non resessint a cumprèndere, at impedidu a sa gara campidanesa de ismanniare su pùblicu suo e de s'impònnere comente fenòmenu "nazional-popolare" pro sa Sardigna, comente est capitadu pro sa gara de sos poetas "a bolu".

De su restu sa gara logudoresa s'est connota in su tempus coladu fintzas in sos Campidanos in ue si cantaiat a "mutetus". Sa natura arcàica e baroca de su versu e su fatu chi potzat èssere gosada dae unu grupu "elitàriu" de amantiosos ebbia, faghet de sa gara campidanesa semper e cando "un'iscusòrgiu" selestu de sas traditziones populares sardas chi tocat de amparare.

Aggiornamento

11/5/2023 - 16:44