Sos aportos linguìsticos sutzessivos a sa latinizatzione

A fùrriu a su 460 p.C. sa Sardigna, oramai de su totu latinizada, fiat istada ocupada dae sos Vàndalos. Est sa prima de una sèrie de presèntzias istràngias, chi nointames no ant a tènnere pro cunsighèntzia s'imponimentu durajolu de sas relativas limbas o de a su mancu una de issas, comente a fiat acadèssidu in pretzedèntzia cun sos Romanos.
Prus in manera simpre ant a provocare s'acollida a banda de s'idioma locale de una sèrie bundante de elementos esternos, destinados in cada casu a non nd'alterare in profundidade s'originària ànima latina prus antiga. Si ricostruisce inoghe de sighida s'elencu de sas limbas de superstrato segundu s'ischema propostu in s'"Istòria de sa limba sarda" de Giovanni Lupinu.
In generale, pro inditare unu pìgiu linguìsticu chi a pustis de eventos istòricos diferentes si subraponet a un'idioma giai in impreu in una determinada àrea, provochende in issu una sèrie de mudadas de òrdine fonèticu, a bortas morfosintattico ma mescamente lessicale, s'impreat in linguìstica istòrica su tèrmine "superstrato": una càusa invocada dae sos istudiosos pro ispiegare su diferente isvilupu assùmidu dae sas limbas romanzas in sas vàrias localidades - chi s'agiunghet a sa costituida dae sas diferentes cunditziones de sostratu adobiadas dae su latinu, comente a apamus giai atzinnadu - est dada apuntu de sos diferentes superstrati chi susu de issas si fiant posados, interagende in su cursu de su tempus.
Pro su sardu podimus annodare chi sas limbas de sostratu sunt cuddas giuntas cun sos dominadores: su vandàlicu, su gregu de sos bizantinos, su pisanu medievale, su catalanu, su casigliano e s'italianu. Ognuna de custas limbas at lassadu in eredade calicuna cosa a su sardu, mentras s'italianu arriscat oe de lu remplasare cale limba printzipale de sos sardos.

Aggiornamento

11/7/2025 - 13:08