Frantziscu Sale

Naschet in Mara su 7 de làmpadas de su 1932 e iscoberit su talentu suo primadiu a s'edade de 16 annos pighende a palcu in sa bidda sua etotu paris cun Antoni Piredda e Remundu Piras. Sas peleas de sa vida l'ant istesiadu però dae sa gara poètica chi torrat a apretziare prus a mannu. In su 1972, a baranta annos fatos, in sa Pratza de Putumajore torrat a pigare a palcu pro sa festa de Santu Cristolu cun cantadores de gabale che a Pepe Sozu e Remundu Piras.
Dae cussu momentu divenit cantadore professionista retzidu bene dae unu pùblicu chi est chirchende talentos noos e boghes raras. Su cumpàngiu suo preferidu abarrat su prus mannu de sos cantadores de Bonorva, ma cantat a s'ispissu fintzas cun Giuanne Seu, Bernardu Zizi, Antoni Pazola, Marieddu Màsala e Frantziscu Mura.

Cunforma a su chi narat Pàulu Pillonca, autore de su sàgiu "Chent'annos Cantadores a lughe 'e luna" (Domus de Janas editore, 2001), una de sas pagas òperas chi fintzas a como ant presentadu unu panorama de sa poesia improvisada, Sale est òmine de naturale riservadu, preferit sos temas de sustàntzia e non li agradat a dare a subra a sos collegas boghende trogas chi ispàssiant sa pratza fintzas a baratu. "Pro Frantziscu Sale sa rialia - iscriet Pillonca - si fundat pius in s'arrejonu chi no in s'atza. Tenet una 'oghe deghìle, a traggiu lenu, azigu simizante a sa de Pepe Sozu. Cunsonat bene cun su tenore, chi jamat a sa 'ortada 'e sa joba 'e sos versos".

Aggiornamento

11/5/2023 - 16:44