Seguici su
Cerca Cerca nel sito

“VANGELU SEGUNDU MARIA”

“VANGELU SEGUNDU MARIA”

“VANGELU SEGUNDU MARIA”

Arribbat subra de sos ischermos de totu Itàlia "Vangelu segundu Maria", su de tres longumetràgios de su regista casteddàiu Paolo Zucca. S'òpera s'ispirat a s'omònimu romanzu, imprentadu in su 1979, de s'iscritora Barbara Alberti chi, cun Amedeo Pagani, at collaboradu fintzas a s'istèrrida de s'iscenegiadura.

Interpretes de su càlibru de Benedetta Porcaroli e Alessandro Gassmann sunt acostagiados dae atores meda e figurantes chi s'espressant pro sa majore parte in sardu.

S'istòria bìblica de Maria e Giuseppe est istada difatis de su totu ambientada in Sardigna chi pro Zucca est sa Galilea in s'annu zero.

Faghent de ammajadore iscenàriu logos antigos meda e incantados, comente a s'àrea archeològica de Tamuli (chi est devènnida Nazarèt), sa Necròpoli prenuràgica de Genna Salixi e su mannu Menhir de Su Corru Tundu a Santu Antoni Arruinas, sa tumba de sos gigantes de Ischit Domu e s'Orcu a Siddi, su Nuraghe de Santa Sarbàna a Silanos, sa Crèsia paleocristiana de Santu Giuanne de Sinnis a Crabas, sas termas romanas de Fordongianus, s'antigu ponte romanu de Allai, sa Basìlica romànica de Santa Justa, su bastione de Saint Remy a Casteddu. E ancora logos naturales de grandu valore paisagìsticu comente a s'àrea bella meda de su riu e boschiva de Gadoni, su picu in sa zona de Elighes Uttiòsas a Santu Lussùrgiu, sa cava de Pèntuma a Noragugume, sa salina de Sal 'e Porcus a Sant'Eru.

trama
Maria est una pitzinnedda de Nazarèt. Comente fèmina totu las est proibidu, fintzas imparare a lèghere e iscrìere. Ma issa bisat libertade e sapièntzia. A sa sinagoga s'entusiasma pro sas istòrias de sa Bìbbia, comente a don Chisciotte cun sos romanzos de ventura. De s'atrevimentu de sos profetas at imparadu sa disubbidièntzia, bisat de fuire subra de un'àinu e iscobèrrere su mundu, andare a largu. Agatat in Giuseppe unu mastru e unu còmplitze. Su coju issoro est castu, unu paravento, mentras issu in manera segreta s'istruisce ammaniende·la a sa fua. Ma aco' un'ostàculu imprevistu: Maria e Giuseppe s'amorant. Istant pro s'abbandonare a sa passione, cando s'ànghelu de s'annuntziatzione arruinat totu. Su pranu de Deus e su de Maria non cointzident affatto.

Cast tècnicu
Regia: Paolo Zucca. Sugetu: Paolo Zucca, Barbara Alberti. Iscenegiadura: Paolo Zucca, Barbara Alberti, Amedeo Pagani. Tzinematografia: Simone De Arcangelo. Montàgiu mùsicas: Marco Spoletini a.m.c , Fabio Massimo Capogrosso. Iscenografia: Luciano Cammerieri. Costùmenes: Beatrice Giannini. Organizadore generale: Cesare Apolito. Trucu: Lucia Patullo. Acontzaduras: Lisandru Durante. Sonu: Stefano Campus. Montàgiu de su sonu: Silvia Moraes.  

Cast artìsticu
Benedetta Porcaroli (Maria), Alessandro Gassmann (Giuseppe), Lidia Vitale (Anna),  
Leonardo Capuano (Gioacchino), Andrea Pittorino (Eliashib). Cun Giulio Pranno (Angelo), Maurizio Lombardi (Erode) e Fortunato Cerlino (Satzerdote).

Produtzione
Su film est prodùidu dae Sky, Indigo Film, sa Luna e Vision Distribution, cun su contributu de su Ministèriu de sos Benes Culturales - Diretzione Generale pro su Tzìnema, de sa Regione Autònoma de sa Sardigna - Assessoradu a sa Cultura e de sa Fundatzione Sardigna Film Commission.

Essidas in sala
Paolo Zucca at a presentare personalmente su film paris cun parte de su cast artìsticu in Milanu giòvia 23 maju (Tzìnema Anteo a sas 20:30), a Roma chenàbura 24 maju (Tzìnema Caravaggio a sas 18:00 e Tzìnema Adrianu a sas 21:00), a Florèntzia sàbadu 25 maju (Tzìnema Astra a sas 18:00 e a su Tzìnema Fiamma a sas 21:00) e in sas dies sutzessivas in totu sas salas de sa Sardigna.

"Vangelu segundu Maria" at a èssere in programatzione in totu Itàlia partinde dae su 23 maju.

Acuistat su billete pro su 23 maju

Pro info:

Tag

Inizio:

2024-05-23

Fine:

2024-05-25

Data:

Subra de sos ischermos de totu Itàlia. Paolo Zucca at a èssere presente a Milanu su 23 a sas oras 20:30, a Roma su 24, a Florèntzia su 25 maju.

Contatti struttura:

Anteo Palazzo de su Tzìnema
P.za XXV Aprile, 8 - Milano (MI)
Giassu web:
Facebook:
Instagram:
tel. +39 02 6597732

 

Aggiornamento

23/5/2024 - 12:21

Dove si trova

Commenti

Scrivi un commento

Invia