Sigismondo Arquer

Sigismondo Arquer est una de sas figuras prus interessantes de s'edade ibèrica de s'ìsula. Naschet in Casteddu in su 1530 de una famìlia in bista sigomente su babbu, Giovanni Antonio, cugùgiat diferente tempus sa càrriga de Abogadu Fiscale de su Rennu. Si laùreat in "utroque iure" a Pisa e in Teologia a Siena. Gràtzias a sos cuntatos presos in custos annos, frecuentat ambientes religiosos presos in carchi modu a sas riformas aviadas dae su luteranèsimu. In su 1549 collàborat a Basilea cun Sebastian Münster a s'istèrrida de sa "Cosmographia Universalis", compilende una monografia subra de sa Sardigna, "Sardiniae Brevis Historia e Descriptio", cale fiant alligongiadas una carta de s'ìsula e una bista de Casteddu. S'òpera at a devènnere in carchi modu s'archètipu de una sèrie de iscritos de su gènere literàriu-istòricu-descritivu destinadu a s'afirmare in sos sèculos sighentes in sa cultura isolana.
Torradu a Casteddu, cugùgiat fintzas issu de sas càrrigas pùblicas in s'amministratzione de su rennu, chi lu giughent in rota de collisione cun s'aristocratzia feudale sarda, gelosa de sos mandos pròpios e pistighingiosu de s'assolutismu règiu. Impresonadu cun s'acusa de eresia, est brusiadu biu in su 1571 a Toledo. In càrtzere iscriet sas "Coplas a s'imagen de su Crucifixo", in ispagnolu, in sas cales est ladina sa denuntzia de sos tràgicos fatos personales cun su richiamu a sas tribulias de sa Passione de Cristu. De su puntu de bista formale issas parent s'insertare in su gènere ibèricu de sa "glosa", su cale fine fiat s'esegesi e sa parafrasi de testos sacros. De su puntu de bista dottrinario sunt su tentativu estremu de una torrada a s'ortodossia.

Aggiornamento

23/6/2026 - 15:17