Sa "terapia de sas ustioni"

Sos sanadores chi a su presente curant sas ustioni sunt 44, de cales 29 fèminas e 15 mascros. Sa majore ala at decraradu de àere imparadu custa pràtica a traessu de calicunu de su nùcleu familiare. Bator ant afirmadu de èssere arribbados dae soles a iscobèrrere sa meighina, duas pro passione e a pustis de annos de tentativos, sos àteros duos colende a traessu de personale de s'ustione, iscoberende s'erba dèchida pro casu.

De sos 15 sanadores subra tzitados 4 òperant cun terapia màgica e 11 cun terapia empìrica; intre sas 29 sanadoras, 18 pràticant una terapia màgica e 11 una terapia empìrica. Intre sos sanadores chi curant sas ustioni cun terapia màgica, 12 si lìmitant a resare sos "brebus" signende su malàidu cun sa rughe, o surbende·lu o finghende de lu gruspire.

Intre sos sanadores chi pràticant sa terapia empìrica, duas unint a s'elementu empìricu chi esplicat s'eficatzidade terapèutica fintzas sa recitatzione de "brebus" e pregadorias chi devent restare segretas. Pro cantu pertocat sas sustàntzias impreadas dae custos sanadores, est istupada sa sighente situatzione: duos curant cun un'ògiu (unu de custos impreat un'ògiu particulare ricavadu dae su tuorlo de sos oos), chimbe cun unu decotu, noe cun un'unguentu, bator cun unu lìcuidu no oggiosu costituidu cun probabilidade de su sutzu de s'erba officinale, ricavadu cun sistemas diferentes de unu sanadore a s'àteru. Custu ùrtimu cursadu terapèuticu, in calicunu casu decraradu in manera crara de su sanadore, a Tula resurtat praticadu in manera difusa, tantu chi ogni famìlia s'ammàniat de sese sa meighina pro sas ustioni.

In virtude de sa presèntzia de sustàntzias pretzisas in manera ogetiva eficatzes in sa cura de sas ustioni, in s'àmbitu de custa patologia su raportu intre meighina traditzionale e meighina ufitziale at manifestadu, craru a livellu de situatziones locales, una tzerta cunsistèntzia, cun momentos fintzas de aberta collaboratzione. In gènere sos mèigos ischint de sa presèntzia de custos sanadores e nde bàjulant sa faina. Sunt istados atzertados numerosos casos in cales sos mèigos, dae in antis malàidos cun ustioni graves, los indiritzant acanta sos sanadores traditzionales. B'at fintzas calicunu sanadore chi, comente a reconnoschimentu de s'eficatzidade terapèutica de sa meighina pròpia, at tentu prus de un'atestadu de su mèigu locale, atestadu in cale li benit reconnota sa risolutzione de casos de ustioni difìtziles de curare. In fines, calicunu sanadore at giai achiridu su brevetu pro sa meighina pròpia e unos àteros si sunt movende in sa matessi diretzione.

Pro cantu pertocat sa trasmissione de custas cumpetèntzias, totu sos sanadores cun terapia empìrica ant giai provididu a istruire in manera adeguada calicunu membru de sa famìlia, mentras cuddos cun terapia màgica ant decraradu de no l'àere ancora fata.
In fines, andat signaladu chi belle totu sos sanadores de sas ustioni cun terapia empìrica curant fintzas unas cantas maladias de sa pedde.

Aggiornamento

6/9/2023 - 03:14