Sos fotògrafos de sa Magnum

Orgòsolo 1962. Foto de Henri Cartier-Bresson

“Èssere in su logu, èssere inoghe pro chi s’est bòfidu” (Marc Riboud). “Unu fotoreporter non est nudda si non tenet sos negativos suos” (Robert Capa). Cun custos fundamentos, Robert Capa, David Seymour (Chim), Henri Cartier-Bresson, George Rodger, William e Rita Vandivert, in maju de su 1947, fundant in Parigi Magnum Photos. S’indipendèntzia in s’iscioberu de su traballu e sa tutela de sa propriedade de sas imàgines fiant sas bases teòricas e operativas segundu sas cales sos reporter de Magnum documentant sos acontecimentos prus importantes de su sèculu XX e presentant a su mundu realidades chi, in àtera manera, fiant istadas disconnotas, a tràmite de sas pàginas de sos printzipales periòdicos, intre Life, Paris Match e Epoca.

In su segundu post-gherra, sa rivalutatzione de sos istùdios subra su folklore e s’etnografia, ma fintzas s’ecu de fenomenos comente su banditismu, richiamant in Sardigna istudiosos e reporter dae totu su mundu, non in ùrtimu sos inviatos de s’agentzia parigina. In su 1950 Werner Bischof, in treighi imàgines, documentat pro su setimanale Epoca sa duretza e s’arretradesa de sas cunditziones de traballu in su Campidano de Casteddu e in s’Iglesiente. A David Seymour, in su 1954, bastant pagos ma eficatzes iscatos pro contare sa profunda devotzione de sos sardos a su màrtire Efisio. S’annu imbeniente Kryn Taconis realizat baranta diacolor intre su portu e sos mercaos de Casteddu, sa processione de Sant’Efisio finas a Pula, sas bias de Orgosolo e de àteros tzèntros de su Sassarese. Henri Cartier-Bresson, su maistru indiscutidu de s’image à la sauvette, arribbet in s’ìsula pro incarigu de Vogue in s’istadi de su 1962 e, intre Casteddu e sa Barbagia, faghet unos cantos iscatos espostos poi in sas gallerias e in sos museos prus importantes de su mundu. Su primu reportage sardu de Bruno Barbey est de su 1964 e, in sos annos imbenientes, àteros reporter de Magnum si alternant in su territòriu insulare: Ferdinando Scianna (1969), Joseph Koudelka (1985), Harry Gruyaert, Gueorgui Pinkhassov e Alex Webb (1998).

Bibliografia
I grandi reporter della Magnum in Sardegna. Nuoro, Ilisso, 2017.

Aggiornamento

4/9/2026 - 08:50