Sa fotografia in Sardigna

Casteddu, "piccioccheddus de crobi" in sa banchina de su portu. Foto de Max Leopold Wagner, de Sardigna DL

Oe s'interessu in sos cunfrontos de su materiale fotogràficu relativu a sa Sardigna a banda de amantiosos, istudiosos, iscolas e universidades, est oramai innegàbile. S'imàgine fotogràfica cuntenet, difatis, una sèrie de informatziones ogetivas de enorme valore e de importu irrinunciabile pro su connoschimentu e s'istùdiu de su passadu nostru e de sa cultura nostra.
Sa sua fruibilità resurtat però difìtzile, gasi comente sa bisione sua de paris, a càusa de su fatu sas fotografias s'agatant cunservadas in medas archìvios, pùblicos e privados, non petzi sardos o italianos ma fintzas europeos e americanos, non semper atzessìbiles a su grandu pùblicu.
Unu àteru elementu de tènnere presente cando si faghet riferimentu a s'ogetu "fotografia" est s'estrema fragilidade sua e deperibilità: totu sos protzedimentos fotogràficos, antigos e modernos, praticados in manera belle perfeta, non podent garantire sa durada de s'imàgine in prus de unu tzertu perìodu, durante su cale custa est sugeta a alteratziones chìmicas chi nde pròvocant sa graduale e crudele isparitzione. Custu protzessu a prus, podet èssere atzeleradu dae fatores atzidentales, prus fitianos de cantu non si creat, comente a erradas metodologias de archiviatzione, incuinamentu, fogos, allagamentos o àteru.
Sa cernita, sa riprodutzione e s'archiviatzione subra de sustennu digitale, postas in atu cun sas mègius tecnologias oe disponìbiles e segundu sos critèrios prus acreditados, podent garantire s'amparu a su mancu de su datu iconogràficu, in prus de chi nde fatzilitare sa consultatzione, s'istùdiu e s'impreu didàticu e editoriale.
Valutende s'enorme cantidade de materiale fotogràficu chi esistit subra de sa Sardigna, a bortas òpera de sos nùmenes prus importantes de sa fotografia, e analizende sa variedade de temàticas afrontadas, nos podimus rèndere contu de s'importu suo subra de su pranu non petzi regionale ma fintzas natzionale e internatzionale.

Aggiornamento

28/8/2025 - 12:42