Curta de sos Iscurtzos

Su primu fine chida de cabudanni in Crabas tenet logu sa festa in onore de San Sarbadore de Sinnis, cun s'ammajadora cursa rituale: sa “Cursa de sos iscurtzos”.

Sa festa bàndida (chi cumprendet su primu sàbadu e sa prima domìniga de cabudanni) est pretzèdida dae noe dies de funtziones religiosas. A s'arbèschida de sa prima die de sa novena su bultu de linna de su Santu, in manera afetuosa mutidu dae sos devotos locales Santu Srabadoeddu, est giutu in professone dae sas fèminas de Crabas, iscurtzas e bestidas cun su bestire traditzionale, a sa bia de su bidditzolu de sa novena. Custu ùrtimu, intituladu a San Sarbadore, est unu burgu de orìgine medievale assetiadu longu su caminu chi giughet a sa tzitade de Tharros. Partinde dae custu momentu su bidditzolu, disabitadu totu su restu de s'annu, est animadu dae sos novenanti chi pigant abitòriu in piticas domigheddas (muristenes) de propiedade issoro.

Su sàbadu mangianu de sa festa bàndida, a s'arbèschida, su bultu de linna de San Sarbadore est carradu dae sa parròchia de Santa Maria Assunta, in su tzentru abitadu de Crabas, finas a sa cresiedda de San Giuanne de Sinnis, acanta sa cale pesat su subra numenadu bidditzolu. S'istàtua de su Santu, disposta subra de una portantina, est carrada a coddu dae chèntinas de corridores iscurtzos, bestidos cun su traditzionale saio biancu, longu unu percursu de unos sete chilòmetros.
Sa die pustis sa cursa est replicada pro aporrire su bultu in Crabas in sa crèsia de Santa Maria.

Sa traditzione cheret chi sa cursa costituat sa rievocazione rituale a cadèntzia annuale de un'acadimentu istòricu chi torrat a artziare a su 1619, ligadu a sas numerosas curreras barbaresche chi atterrivano sas populatziones locales. Etotu durante unu de custos assaltos sos abitantes de su logu diant àere postu in francu s'istàtua de San Sarbadore currende iscurtzos a traessu de su sartu. Su polverone pesadu dae sa cursa diat àere fatu crèere crèere a sos saratzenos de s'agatare in cara a unu poderosu e numerosu esèrtzitu, induende·los a sa fua.

Oe in die sa Cursa de sos iscurtzos s'assòtziat a significados noos presos a sa promotzione turìstica de su territòriu, cun sa valorizatzione de sas risursas materiales e immateriales, no ùrtimas cuddas relativas a s'àmbitu eno-gastronòmicu.

Aggiornamento

23/8/2024 - 20:23