Su sardu limba romanza

Su sardu est una limba "romanza" o "neolatina", est a nàrrere unu domìniu linguìsticu chi derivat de sa limba faeddada dae sos antigos Romanos. A su matessi modu lu sunt su portoghesu, s'ispagnolu, su catalanu, s'occitanico, su franco-proventzale, su frantzesu, s'italianu, su ladinu, su friulanu, su cursu, su dalmatico (oe istudadu) e su rumenu.
Comente iscriet Giovanni Lupinu in s'Istòria "sua de sa limba sarda", "adotende una metàfora fitiana in sos istùdios glottologici ispirada a su parentiu umanu, custas podent èssere definidas 'limbas sorres' in cantu riconducibili a una comuna 'limba mama'.
In tèrmines prus ampros, custu signìficat in sustàntzia chi in su longu protzessu de formatzione de sa limba isolana, chi durat finas a sas dies nostras, sa conchista romana de s'ìsula in su 238 a.C. e sa cunsighente massissa difusione de su latinu in su territòriu chi faeddaiat paleosardu e pùnicu rapresentant tzertamente s'episòdiu tzentrale e prus importante, destinadu a disegnare in profundidade sa carena de sa limba chi at a cumintzare a si manifestare documentariamente a pustis de su 1000 p.C.".
Segundu cantu referit Max Leopold Wagner, sa conservatività de sa limba sarda respetu a su latinu est unu datu achiridu: "Su sardu, comente a nche si presentat in sos documentos antigos e comente a totora sonat in sas regiones tzentrales e mescamente in su Bittese e in su Nugoresu, faghet a cunsiderare, fintzas in manera fonètica, su continuatore prus sìncheru de su latinu".
Una definitzione chi at fatu sa fortuna de sa limba sarda intre totu sos istudiosos e apassionados de filologia.

Aggiornamento

15/7/2025 - 13:08