S'architetura oe

Faghet a serrare sa rassegna de sas architeturas prus reghentes, chi assumet ancora de prus su caràtere de unu sèberu intre diversas possibilidades, cun unas cantas realizatziones chi pro motivos diferentes balent de ateretantos "cantos ùnicos", unu pagu pro su tipu de edifìtziu (cuddu cunventuale), unu pagu pro s'aspetu elitàriu de s'operatzione (su teatru a s'abertu de piticas dimensiones), unu pagu pro sa nobilitazione de unu gènere oramai usuradu e mescamente realizadu in sèrias (su tzentru cummertziale).

Su primu, fintzas in òrdine cronològicu, est su cunventu de sas Carmelitanas, realizadu in sa punta de Cucullìo a Nùgoro de s'architetu Savin Couëlle, fìgiu de s'"imbentore" de sa Costa Smeralda. Si tratat de un'interventu "plàsticu" chi modellat ambientes e volùmenes cun una libertade compositiva e un'atentzione a sa minuda chi testimòniant una sorta de "artesania architetònica" tìpicu de sos Couëlle.

Su teatru de Mario Ceroli de Porto Rotondo est sa riproposizione de su teatru antigu, e duncas a s'abertu, cun una cavea e s'orchestra, ocupada dae sos logos a sèere, serradas dae unu muru ue sas tzitas clàssicas sunt ammustradas, puru in s'inconfondibile manu de s'artista.

In Terranoa, in fines, su tzentru cummertziale "Terranova" devenit sa traspositzione materiale de unu bisu de su printzipale artèfitze suo, s'architetu Aldo Rossi: sa resa tangìbile de sos ammajos de un'architetura comente a cudda sarda, caraterizada dae sa cromia de sos materiales, s'ispissu assotziados in rigas orizontales, devenit su Leitmotiv de sa realizatzione olbiense. Una "memòria" de su passadu, in summa, non sa còpia sua o, peus, s'imitatzione sua in un'improbàbile istile "neosardo", chi in unu momentu de grandu intzertesa chi riguardat non petzi s'architetura ma sa vida de s'òmine, podet devènnere unu puntu de riferimentu, cumpartzìbile o no, comente a monito cara a su futuru.

Aggiornamento

10/9/2023 - 16:05