Diàlogos a sa Bi.G: Libros chi faeddant a su presente. "Paràulas e Imàgines"

Su 12 martzu a sa Bi.G, Biblioteca regionale "Grazia Deledda", de reghente intitulada a sa grandu iscritora sarda in su tzentenàriu de su cunferimentu de su Nobel, s'at a tènnere su segundu addòbiu de su tziclu de addòbios Diàlogos a sa Bi.G : Libros chi faeddant a su presente, pessadu pro favorire s'atzessu a sa cultura e segugiare riflessiones abertas subra de temas de atualidade e ofèrrere sa biblioteca comente a ispàtziu biu de addòbiu cun sas boghes de su mundu culturale cuntemporàneu, ue sa letura si faghet esperièntzia colletiva e sos libros trastu e ocasione de cunfrontu.

Su tema de su segundu addòbiu est "Paràulas e imàgines": sos limbàgios visivos comente a s'illustratzione e su giornaleddu trasformant sos testos in esperièntzias visuales, fatzilitende s'immedesimazione e sa cumprensione emotiva, agende ue a s'ispissu sas paràulas de sole non podent arribbare.
A traessu de sa sensibilidade artìstica est prus fàtzile a superare sas barrieras linguìsticas e culturales, interessende unu pùblicu ampru e diversificadu.
S'illustratzione, su giornaleddu e su tzìnema de animatzione rapresentant oe unas cantas espressiones prus significativas de sa produtzione artìstica cuntemporànea regionale e ant contribuidu a delineare un'ambiente intelletuale e creativu chi at agiuadu s'intrada de sa Sardigna in sa modernidade.
S'afirmadura de custas esperièntzias in su panorama artìsticu natzionale e internatzionale at cointzìdidu cun una fase detzisiva in su protzessu de definitzione de s'identidade culturale sarda cuntemporànea, contribuende in modu determinante a sa crèschida e a su cunsolidamentu de su cuntestu culturale isolanu.

In ite medida custa traditzione est oe connota? E ite podent fàghere sas bibliotecas sardas pro divulgare su patrimòniu culturale regionale collegadu a su mundu de s'illustratzione?

Giòvia 12 martzu, de sas oras 17:00, a sa Biblioteca regionale s'ant a adobiare Bepi Bìngia, Stefania Costa, Eva Rapant, Daniele Serra e Luigi Zara pro dialogare subra de custos temas paris cun su bibliotecàriu Maurizio Ortu e su pùblicu interessadu.

Pro s'ocasione, in s'àrea acasàgiu de sa Sala cunferèntzias de sa Bi.G at a èssere esposta una seletzione de òperas intre sas prus rapresentativas de s'atuale panorama regionale, visitabile partinde dae sas oras 16:30.

Sos Diàlogos a sa Bi.G sunt totus de badas e a intrada lìbera.