Eneolìticu reghente

Cun su tràmudu a s'Eneolìticu reghente (2400-2100 a.C.) cumparet sa cultura de Monte Claro, chi leat su nùmene dae su montigru de Casteddu in ue fiant istadas iscobertas unas cantas tumbas cun unos cantos istèrgios de tzeràmica. Sos datos archeològicos faghent testimonia, pro custa fase, de sa conchista de una manera organizada de bìvere in su bidditzolu.
Cun su tràmudu a s'Eneolìticu reghente (2400-2100 a.C.) cumparet sa cultura de Monte Claro, chi leat su nùmene dae su montigru de Casteddu in ue fiant istadas iscobertas unas cantas tumbas cun unos cantos istèrgios de tzeràmica.

Sos datos archeològicos faghent testimonia, pro custa fase, de sa conchista de una manera organizada de bìvere in su bidditzolu (duos esempros: San Gemilianu in Sestu; Monte Olladiri in Muristene) e s'ismànniat s'isfrutamentu agrìculu de sos sartos.

Sunt intro sa cultura de Monte Claro finas sas primas costrutziones chi si podent definire "megalìticas", comente sa "pinneta" de Biddarega. In custa categoria de edifìtzios, bantant iscumprou particulare, sas chi li narant "murallas megalìticas" connotas in sas localidades de Monte Baranta (S'Ulumedu) e de Monte Ossoni (Casteddusardu), de significu ca si podent interpretare cale sinnu de sa nàschida de esigèntzias defensadoras noas e prus monumentales in cunforma a su passadu.

Sas tipologias de sas sepolturas mudant dae sos ipogeos a putzigheddu tzentrale dae in ue si derramant unu o prus vanos (comente in sos giassos de Monte Claro e de Sa Duchessa in Casteddu), a sos dolmen (comente a Motorra, Durgale) e a sas tzistas lìticas (comente a San Gemilianu de Sestu).

Si connoschent deretu sas produtziones de istèrgios in tzeràmica. Sunt testos de dimensiones mannas (sas "sìtulas"), trìbides, discheddas, concheddas, connotos pro su colore chi mudat dae su ruju-chèrbinu a su chèrbinu craru e a su tanadu-nieddu. Tìpicas puru sas decoratziones a costas o a incrastas verticales e orizontales, e finas sa decoratzione "a stralucido" chi distinghet unas cantas formas.

Aggiornamento

24/10/2023 - 16:35