Sa cumpetitzione

Sa cumpetitzione intre sos cantadores est unu fatu de importu e detzisivu pro sa resèssida de una gara. Sa "rialia" est su fundamentu de sa cuntierra chi si faghet intre duos o prus cantadores.
Sa cumpetitzione intre sos cantadores est unu fatu de importu mannu e detzisivu pro sa resèssida de una gara. Sa "rialia" est su fundamentu de sa cuntierra chi si faghet intre duos o prus cantadores. Su pùblicu chi pigat parte a sas garas s'isetat de bìdere un'ispetàculu in ue sa muta bona de sos artistas siat iscumproada cun su cunfrontu cun àteros poetas de su matessi, si non prus artu, balore. A sa fine, sena cuntierra e cumbata intre sos artistas, non diat esìstere mancu s'idea matessi de sa gara.

A ogni manera non tocat a nche brincare mai cussa làcana fine e dìliga chi b'est intre su tantu giustu de rialia (fintzas si petzi retzidada) e su disìgiu malu de s'atacu personale sena motivu. Si narat chi, mescamente pro sos poetas de sa prima generatzione de su Noighentos, s'impitu de immagines rebestas e fortes esseret prus "normale", pighende in cunsideru fintzas sos tempos malos de tando. In annos prus reghentes, fintzas sa gara s'est "indurchida" pro su chi atenet a sos temas e si sunt chircadas metàforas prus pagu atzudas.

Si Gavinu Còntene o Pitanu Morete podiant fintzas "minetzare" in carchi manera sos aversàrios issoro, oe custu non càpitat prus. Sa rialia est malàida, pro Pàulu Pillonca, cando est de badas e sena profetu e non serbit a megiorare su chi si s'est cantende in pitzu de su palcu. Dinàmicas bastante naturales e normales leat, in àteros momentos, sa cumpetitzione de sos cantadore chi est "esterna" a sas garas, pro nde fàghere contu de issos e si fàghere cramare dae sos comitados organizadores.

Aggiornamento

11/5/2023 - 16:44