Ulìana, Gruta Corbeddu

Sa gruta Corbeddu, assetiada a s'internu de sa badde de Lanaittu, devet su nùmene suo a su famigerato bandidu barbaritzinu Giovanni Corbeddu, bìvidu cara a sa metade de s'Otighentos, chi l'aiat seberadu comente a amparu. Si tratat de unu tuvu a isvilupu agiumai orizontale, longa unos 130 m, partzida in tres "salas" printzipales e terminante in unu piticu ambiente. Sos iscavos archeològicos ant cunsentidu su recùperu de repertos de notèvole importu pro sa ricostrutzione de s'istòria sarda: est difatis in custu giassu chi acudint sas primas atestatziones archeològicas chi testimòniant sa presèntzia umana in Sardigna in su Paleolìticu superiore, paris a àteros repertos fortzis inquadrabili in su Mesolìticu e a atestatziones relativas a su Neolìticu antigu. Sos repertos inquadrabili in su Paleolìticu superiore sunt un'ossu temporale e unu mascellare umanos, ambos giacenti in su matessi livellu e chi apartenent a unu matessi indivìduu, atzapados in sa segunda sala. Sunt datàbiles, a traessu de sas anàlisis a su radiocarbonio, a 13.500 annos de su presente (cun un'oru de errore de 140 annos).
Semper in sa segunda sala de sa gruta est istadu recuperadu prus de reghente unu àteru singulare restu fòssile umanu, cunsistente in sa portzione prossimale de sa prima falange de una manu, datada unos 20.000 annos de su presente.
A galu oe custos repertos resurtant èssere sos prus antigos redossos umanos atzapados in unu cuntestu archeològicu insulare de su Mediterràneu. Àtera particularidade cunsistet in su fatu chi custos ossos presentant caraterìsticas morfològicas chi evidèntziant unu marcadu endemismu respetu a sas àteras genias de su gènere "Homo" atestadas in Europa in cuddu perìodu.
De su matessi pìgiu in cale fiant istados atzapados sos restos òsseos umanos acudint fòssiles chi apartenent a unu nùmeru reduidu de genias endèmicas de fàuna agreste, su cervide "Megaceros cazioti" e su roditore "Prolagus sardus", ambos oramai istudados, in assòtziu a pagos manufatos de su Paleolìticu superiore. De particulare rilievu est in prus s'acatamentu, fatu posca in su fundu de sa setzione de iscavu de sa prima sala, de una portzione prossimale de un'ulna umana, assignada a un'indivìduu diferente de cuddu a cale aparteniant sas partes de cabitza, chi fiant istadas atzapadas in sa segunda sala.
Fintzas custu interessante frammentu òsseu presentat una morfologia diferente de sa de su "Homo sapiens" e aparit caraterizadu dae un'annoditadu endemismu.
Sunt istados atzapados fintzas frustoli de carbone mistos a ossos de animales agrestes, cun rastros de fogu, datàbiles a unos 25.700 annos de oe. Significativu in prus su rinvenimentu de indùstria in ossu e dae pedra: raschiatoi, lamas, bulini, etc., in seltze, cuartzu, carcare marnoso, datàbiles intre sos 14.500 e sos 12.000 annos de su presente. Si signalant in fines repertos riconducibili a sas fases de su Neolìticu antigu e mèdiu.

Istòria de sos iscavos
In su 1967 Bruno Piredda, unu de sos fundadores de su "Grupu Grutas Nugoresa", aiat notadu sa presèntzia in sa gruta de ossos de "Prolagus sardus", unu roditore de sa segat de unu conìlliu, oramai istudadu. In su 1968 sa paleontòloga istadunidensa Mary Dawson de su "Cornegie Museum" de Pittsburg (Istados Unidos), bènnida a connoschimentu de s'iscoberta, aiat progetadu una campagna de iscavos sientìficos. In su 1982 fiant istados printzipiados iscavos sistemàticos in unos cantos ambientes de sa gruta, suta de sa diretzione de P.Y. Sondaar de su "Instituut voor Aardwetensc-happen e Rijksuniversiteit" de Utrecht (Olanda), cun sa collaboratzione de sa Soprintendenza a sas Antighidades de Tàtari e de Nùgoro, rapresentada dae s'archeòlogu Mario Sanges. Sos iscavos aiant sighidu in sos annos 1983 e 1986.

Bibliografia
E. Contu, La Sardegna preistorica e nuragica, I, La Sardegna prima dei nuraghi, Sassari, Chiarella, 1998;
G. Lilliu, La civiltà dei Sardi. Dal Paleolitico all'età dei nuraghi, Nuoro, Il Maestrale, 2004.

Comente arribbare
Sa gruta Corbeddu est chi si podet sighire a traessu de un'àndala chi tenet cumintzu a dereta de s'intrada de sa gruta "Ischit Ocas" e torrat a artziare su monte.

Tag

Categoria Struttura: Monumentu naturale

Tipologia Contenuti: Archeologia
Iscièntzia e/o tècnica

Fruibilità: Abertu

Provincia: Nùgoro

Comune: Oliena

Macro Area Territoriale: Tzentru Sardigna

CAP: 08025

Indirizzo: SP 46 - località Valle di Lanaitto

Telefono: +39 339 7126111

Email: info@coopcorrasi.com

Sito Web: supramonteexperience.com/2024/07/13/cooperativa-corrasi-valorizzazione-e-promozione-della-valle-di-lanaitho/

Instagram: www.instagram.com/campobaselanaitho

ghennàrgiu - nadale

Lunedì - Martedì - Mercoledì - Giovedì - Venerdì - Sabato - Domenica

09:00 - 18:00

Informazioni sui biglietti e sull\'accesso: Pro averguare eventuales variatziones in sos oràrios de atzessu a su giassu e in su costu de sos billetes, si cussìgiat de mutire in manera antitzipada s'istrutura a su nùmeru +39 339 7126111

Modalità di accesso: a pagamentu

Biglietti :

Intreu : 5 €, adultos, .

Reduidu : 3 €, minores finas a sos 12 annos, adultos in prus de 65 annos, scolaresche, .

Cumulativu intreu : 10 €, adultos, pro bìsita a sa Gruta Corbeddu, a su Villaggio Nuràgicu Ischit Sedda e sos Carros e a sa gruta Ischit Ocas 'e subra de Bentu .

Cumulativu reduidu : 7 €, minores finas a sos 12 annos, adultos in prus de 65 annos, scolaresche, pro bìsita a sa Gruta Corbeddu, a su Villaggio Nuràgicu Ischit Sedda e sos Carros e a sa gruta Ischit Ocas 'e subra de Bentu .

Informazioni sui servizi: Sas bìsitas ghiadas sunt disponìbiles pro su Villaggio Nuràgicu Ischit Sedda e Sos Carros e sa Gruta Corbeddu.

Altri servizi: A 1,5 Km ca. de distàntzia, in antis de sa biglietteria, est presente unu puntu de ristoro in cale sunt disponìbiles de sos aposentos.

Aggiornamento

14/3/2025 - 13:32

Servizi

Sala per la didattica