Pietro Mura

"Fippo operaju 'e luche soliana e como isco oscuru artisanu de versos" iscriiat Pietro Mura, unu de sos majores poetas "in limba" de su Noighentos.
Naschet in Ìsili in su 1906 de una famìlia de ramai e cummertziantes de ràmene, faina a sa cale si dèdicat, ma cun iscassu interessu, a pustis de àere abbandonadu s'iscola elementare. Cumintzat a cumpònnere versos a s'edade de batòrdighi annos. Aende·si trasferidu a Nùgoro, si còjuat, aberit una butega artisana e gestit una cartoleria. Sos làngios afares l'induint a mòvere comente a voluntàriu in Àfrica Orientale, ue abarrat dae su 1936 a su 1938. A pustis de sa cuntierra si dèdicat a intensas leturas e toddet una rica biblioteca cun numerosos clàssicos de sa literadura e de su pensamentu, ma mescamente òperas de poetas cuntemporàneos, italianos e istràngios. Su talentu suo e sos temas e sos motivos de s'Andalusia chi ricurrent in sos cumponimentos suos li balent s'apellativu de "Garcia Lorca sardu". A su Prèmiu Otieri otenet sos prus bramados reconnoschimentos e est cumbidadu a fàghere parte de sa giuria. Morit in su 1966. Sa poesia "Fippo operaiu 'e luche soliana" est cunsiderada su manifestu de sa poesia noa in limba sarda de su Noighentos. S'annoadura chi annanghet Mura a sa poesia "in limba" signat su coladòrgiu definitivu a sa modernidade e a s'abertura de sa limba sarda a su mundu. Su fìgiu Antonio at a sighire sas orminas de su babbu.

Aggiornamento

4/3/2025 - 19:36