Su Burgu, Nuraghe Costa

Su monumentu est assetiadu a s'internu de su padente de Foresta Su Burgu in localidade Su Pranigheddu de S'Unighedda.
Comunemente mutidu Ischit Reggia, cumprendet unu nuraghe cumplessu, unu bidditzolu in tundu e unu possente antemurale (superfìtzie de 450 mq).
Su nuraghe est costituidu dae unu mastio e de unu bastione de bator turres segundàrias cun a s'internu una corte.
Sa turre tzentrale (diam. m 14) est fraigada cun blocos de basalto poligonali in s'ala inferiora e bene traballados in cudda superiora.
Bi s'atzedet a traessu de un'intrada - orientada a E e a lughe retangulare - chi ponet in unu passadissu (lungh. m 4); subra de su muru s. de custu s'aberit s'intrada a su vanu-iscala chi cun isvilupu elicoidale giughiat a sos pranos superiores. Custu vanu podet èssere cursadu oe petzi in su tretu initziale (lungh. m 2,50).
Sa càmera aparit ricolma de terra e de massos crollados dae sas istruturas superioras.
Su mastio s'incrarat subra de sa corte de disimpinnu - a pranta belle semitzircolare (m 6) - a su cale s'atzediat tràmite un'intrada a S.
Subra de sa corte s'aberiant sas intradas de sos passadissos chi poniant in sas bator turres segundàrias: una turre resurtat oe belle de su totu crollada; una segunda cunservat petzi in ala sos muros de sa càmera, ue s'aberiat una nitza; unas àteras duas turres resurtant oe inaccessibili.
A inghìriu a su bastione, pro un'ampra superfìtzie, s'estendet su bidditzolu: intre sa fita vegetatzione arbustiva est possìbile como individuare cun craresa petzi duas cabannas a fundu tzirculare (perìmetru de m 9) realizadas cun filari de blocos poligonali de basalto.
S'elementu chi nointames caraterizat e rendet ùnicu custu monumentu est s'antemurale.
S'istrutura murària difensiva - chi faghet a sighire oe pro unu tretu longu m 60 (alt. m 3) - est priva de turres e cunservat, eccezionalmente, su "caminu de ronda" (largh. m 1,40).

Istòria de sos iscavos
Su cumplessu est istadu fossadu dae Giuseppa Tanda.

Bibliografia
G. Tanda, Goceano: sos sinnos de su passadu. Mustra gràfica e fotogràfica, Sassari, Chiarella, 1992, p. 183;
A. Moravetti, "Sos insediamentos antigos", in Montagne de Sardigna, a cura de I. Camarda, Sassari, Carlo Delfino, 1993.

Comente arribbare
Dae sa fratzione de Foresta Su Burgu si sighit sa signalètica pro cròmpere su Nuraghe Costa; arribbados a sas iscuderias Costa, si lassat sa màchina e si sighit a pees a manca longu un'àndala in pigada; s'adobiat una furcadura e si pigat s'àndala a dereta finas a cròmpere unu cancelletto de linna. Su cumplessu nuràgicu si scorge a cùrtzia distàntzia intre sa fita vegetatzione.