Sa muta, su tempus, su tràgiu

Elementos de importu mannu de sa gara poètica e de sas virtudes de ogni cantadore sunt sa muta, su tempus (sa lestresa cun sa cale s'imbentat e si cantat s'otava) e su tràgiu (sa manera cun sa cale s'isterret su versu pro sos ascurtadores).
Elementos de importu mannu de sa gara poètica e de sas virtudes de ogni cantadore sunt sa muta, su tempus (sa lestresa cun sa cale s'imbentat e si cantat s'otava) e su tràgiu (sa manera cun sa cale s'isterret su versu a sos ascurtadores).

Sa muta est sa pantàsima e su disìgiu de ogni poeta. Sa richesa sua prus manna, o sa timòria sua prus cuada. Sena sa muta tocat a s'ismentigare de fàghere una gara bona, gasi comente si sa muta est bona una gara est semper e cando mègius de un'àtera. Sos artistas mannos de "s'otada", cuddos chi sunt resèssidos a sarvare su nùmene issoro dae s'ismèntigu, sunt istados sena duda semper premiados dae sa muta. Custa est de seguru unu donu de natura, ma chi andat fintzas megiorada cun s'esertzìtziu, sa pràtica e abitende garas e palcos.

Su tempus pro cumpònnere e cantare s'otava est intradu dae pagu in sos pensos de sos istudiosos chi analizant su fenòmenu. S'est pessadu fintzas de cronometrare sas garas registradas pro cumprèndere comente si podiant cumportare sos poetas diferentes cunforma a sos tempos de risposta, creatzione, cumpositzione e retzitatzione musicada de sa poesia improvisada. In su matessi tempus est partu de importu fintzas su cunsonu de su cantadore sìngulu cun su tenore chi l'acumpàngiat. Est pretzisu chi custu s'agarbet a ogni sìngulu artista.

Cun tràgiu (o tratu) s'indicant imbetzes totu sas caraterìsticas chi distinghent sa boghe de ogni artista in cunforma a sos àteros. No est de importu petzi sa fortza, ma fintzas sa capatzidade melòdica e de timbru. A tènnere una boghe chi agradat bolet nàrrere chi su pùblicu at a ascurtare sas otavas tuas cun unu praghere prus mannu. Non serbit, pro otènnere resurtados bonos in su palcu, tènnere su donu de sa creatzione poètica si non si tenet unu tràgiu bonu.

Aggiornamento

11/5/2023 - 16:44