Sas isculturas bizantinas

Pluteo de edade mediobizantina, bestiario - Museu Archeològicu Natzionale de Casteddu - de Catàlogu BBCC RAS

Intre su X e sas primas dècadas de su sèculu XI, cando sa Sardigna bizantina evolviat in sa Sardigna giudicale, si còllocat una sèrie de isculturas marmòreas, bènnida de diversas localidades de su Casteddàiu, intre sas cales rivestit un'ispetziale interessu sa lastra cun grifo e pegaso, agatada in mare acanta s'ìsula de San Macario (Pula) e custoida in su Museu Archeològicu Natzionale de Casteddu.
(bides imàgine a cumintzu pàgina)
Sa tècnica e sos motivos ornamentales de custas isculturas rivelant fortes relatziones cun sa costa campana, sede de ducados de cultura bizantina, mentras sas iscritziones in limba greco-bizantina dimustrant chi, in sa fase formativa, s'istitutzione, sa cultura e s'arte giudicale avertent su bisòngiu de legitimare sa realidade istòrica pròpia a traessu de su riferimentu in Bisàntziu cale fonte de autoridade suprema.
Pro sos màrmaros epigràficos e iscultòreos mediobizantini de su giuigadu de Casteddu s'est in generale afirmada s'ecuatzione segundu cale a sa parte diat currispòndere su totu, ma bisòngiat avèrtere chi sa sola presèntzia de frammentos iscultòreos altomedievales, cando non sufragada dae ulteriores datos de cuntestu, non bastat a nde cumprovare sa natura de "documentu" indiscutìbile de s'esistèntzia de un'architetura coeva, o comente si siat preesistente chi siat istada dotada, intre sa metade de su X e sas primas dècadas de su sèculu XI, de arredu litùrgicu o decoraduras architetònicas in màrmaru.
In sa majore parte de sos casos, difatis, no est possìbile a nde dimustrare sa cunditzione de materiale locale, tantomeno sa relatzione cun una fase prus antiga de su matessi edifìtziu. In unos cantos casos si nde podet propònnere sa pertenèntzia a àteru edifìtziu, coevo a sos materiales ma non in manera netzessària assetiadu in su matessi giassu, si puru a non grandu distàntzia de su logu de reimpreu, sende chi si devet supònnere non prus de una die de carru, pro una cumbènia in su trasportu de sos materiales.

Aggiornamento

27/5/2026 - 14:42