Casteddu, Polveriera

Su palatzu de s'ex Polveriera Règia est sa sede de sa Galleria Comunale de Arte. S'edifìtziu est atzufadu in su birde de sos Giardinos pùblicos.
S'edifìtziu, costruidu a sa fine de su Setighentos, fiat a su cumintzu sede de sa polveriera règia. S'elegante fatzada neoclàssica fiat istada fraigada in su 1828 subra de progetu de Carlo Boyl de Potuvigari. Fiat istadu trasformadu in Galleria de Arte a sa fine de sos annos binti de su sèculu passadu, a òpera de su progetista casteddàiu Ubaldo Badas.
Sas salas de sa Galleria acasàgiant como sa Colletzione Ingrao e sa Colletzione tzìvica de sos artistas sardos. Sa Colletzione Ingrao, donada a su Comunu de Casteddu in su 1999 a pustis de sa morte de su colletzionista Francesco Paolo Ingrao, cumprendet unas 500 òperas intre pintados, isculturas e disinnos. Un'importante nùcleu a traessu de su cale est possìbile ripercorrere tapas fundamentales de s'evolutzione de s'arte italiana de su primu Noighentos: de Umberto Boccioni a Giorgio Morandi, de Fortunato Depero a Mino Maccari.
Sa Colletzione tzìvica de sos artistas sardos cumprendet pintados e isculturas realizados intre su 1900 e su 1970 de artistas chi ant fatu s'istòria de s'arte in Sardigna: intre sos àteros, Costantino Nivola, Maria Lai, Gaetano Brundu, Tonino Casula, Pinuccio Sciola. De forte impatu emotivu sunt sos bellos meda gessi originales de Francesco Ciusa, intre cale ispicat "Sa mama de s'ochidu", binchidora a sa Biennale de Venètzia in su 1907. A s'internu de sa Galleria s'agatat fintzas sa Biblioteca Ingrao, asciugàriu sientìficu e bibliogràficu a sa colletzione de òperas de arte: si cumponet de unos 4.000 volùmenes de interessu prevalentemente istòricu artìsticu.

Bibliografia
S. Naitza, Architetura de su tardu '600 a su classitzismu purista. Nùgoro, Ilisso, 1992, ischeda 65.