??teros poetas

Sos nùmenes prus famados de sos poetas a bolu sunt cussos chi ant aguantadu pro tempus meda a sas garas in sos palcos. A s'ispissu ant provadu a si pònnere a cantare finas poetas prus pagu ingeniaghes. Custos però non podiant reventire pro tempus meda ca, a fàghere poesia a bolu, bi cheret talentu e abrìtiu naturales chi est malu a istròchere. Finas s'avesu de nàrrere sos versos tentos a mente no assegurat sa bona resèssida, ca su pùblicu est pibincu e a s'ispissu ammentat un'otava giai intesa in un'àtera gara. A fitianu est costadu però chi sa dìcia no apat agiudadu a talentos chi podiant essire a campu e in tames sunt abarrados belle disconnotos. De ogni manera bi fiant paritzos poetas connotos dae sa gente, mancari chi non gasi famados comente a cussos numenados in sas biografias dedicadas. Sos nùmenes chi si podent fàghere sunt cussos de Tomasu Pinna Gherrinu de Thiesi, Elia Busellu de Piaghe, Tatanu Curcu de Cùglieri, Pitzente Presti de Bòrore, Nanneddu Chìghine de Itireddu, Costantinu Longu de Bolòtana, Pitzente Sìmula de Santulussùrgiu, Barore Sini de Bultei, Nenardu Ara de Bidumajore, Pedru Biosa, Pedru Murone e Nanneddu Solinas de Bonorva, Giuanne Puzone de Turalva, Antoni de Monte de Thiesi, Barore Riu de Biddanoa Monteleone e Antoni Canu de Ulìana.

Aggiornamento

11/5/2023 - 16:44