??teros poetas

Sa gara poètica "imbentada", o - pro la nàrrere mègius - regularizada, dae "tiu" Antoni Cubeddu connoschet in sa Sardigna de sa fine de s'Otighentos e de sos primos de su Noighentos una fortuna mai bida in antis. Sa gara, in sa fòrmula sua istandardizada, chi previdit una paga pro onni poeta cuncurrente, si difundet in parte manna de s'ìsula. Non petzi su Cabu de Susu e su Tzentru, chi sunt prus a curtzu pro sa manera de faeddare seberada dae sos poetas cun una limba poètica "comune", ma finas su Cabu de Giosso s'indeosat de sa passione manna fache a otavas, batorinas, modas, esòrdios e temas. Sos chi iscurtant sas garas in sas pratzas de s'ìsula sunt medas. Sunt medas finas sos poetas, o sos chi cherent imparare, chi tentant sa fortuna e pigant a palcu a si proare cun sos mègius. Si cunservat su nùmene e s'ammentat petzi cuddos chi in calicuna manera aiant tentu fortuna e capatzidade. Poetas misconnotos de chie s'ischit pagu e nudda. A bortas su nùmene ebbia. Pro esempru cuddos de Antoni Cugurra de Portu Turres, Giuampedru Dore de Biddanoa Monteleone, Antoni Nonna de Òsilo, Antoni Pinna de Ossi, Gavinu e Serafinu Pinna de Thiesi, Barore Piredda de Codronzanu, Tzitzu Moritu de Otieri. Sa gara de sos cantadores in logudoresu, pro sa Sardigna de cuddos tempos, rapresentat unu "fenòmenu" meru e sìncheru chi si diat pòdere paragonare a unu movimentu culturale a su cale leat parte onni classe sotziale. Gente malassortada chi, pro mèdiu de sos endecassìllabos e de sas rimas, intrat, nessi a tretos e de carchi manera, a sa difusione de sos arresonos polìticos, sotziales, religiosos e culturales de s'època.

Aggiornamento

11/5/2023 - 16:44