Sa segunda generatzione de cantadores

Sa segunda generatzione est sa chi s'est pesada a s'umbra de sos cantadores prus famados de sa prima e chi at paradu fronte in carchi manera a sa proibitzione clèricu-fascista de sos annos Trinta e a su dramma de sa Segunda Gherra Mundiale. Remundu Piras e Barore Tucone sunt sas duas figuras chi si distinghent dae totu sas àteras pro abilidade poètica e fortza personale.
In custa classificatzione "arbitrària" de sos talentos poèticos chi ant connotu s'istòria de sos palcos, sa segunda generatzione est sa chi s'est pesada in s'umbra de sos cantadores prus famados de sa prima e chi at paradu fronte in carchi manera a sa proibitzione clèricu-fascista de sos annos Trinta e a su dramma de sa Segunda Gherra Mundiale. Remundu Piras e Barore Tucone sunt sas duas figuras chi si distinghent dae totu sas àteras pro abilidade poètica e fortza personale.

Sa calidade generale artìstica no est mala e sa gara poètica in pitzu de sos palcos, chi est oramai "traditzionale", connoschet, a su mancu fintzas a sos Annos Setanta de su sèculu coladu, una sorte bona e manna. Dae cussu momentu in dae in antis si podet faeddare de crisi, ma fintzas a tando nemos podet firmare s'unda de otavas e modas chi si produit gràtzias a sos poetas populares de s'iscola logudoresa. Antis, s'unda s'illargat e birat in ogni cugione de Sardigna.

Fintzas in su Campidanu a inghìriu de Casteddu, in ue si costumaiat a cantare "a mutetus", sa gara "a bolu" logudoresa cumparit semper prus a fitianu paris cun cussa locale. S'industrializatzione e sa modernizatzione rebesta de s'ìsula cumentzat a fàghere sufrire custa arte antiga. Sas biddas s'isbòidant, sa bida divenit meda prus lestra, sa limba sarda si lassat in favore de s'italianu. Nch'est semper de mancu su tempus pro s'andanta lena, sàbia e abista de sos poetas de sos palcos.

CANTADORES
Barore Tucone
Remundu Piras
Barore Sassu
Giommaria Pulina
Frantziscu Demartis
Giuanninu Fadda
Cìciu Piga
Andria Nìnniri
Antoni e Gavinu Piredda
Àteros poetas