Bratzale de oro dae Tharros

Sos oros de Tharros

Gennaro Pesce in su 1966 aiat apretziadu pro belle chimbe milliardos de francos su valore de sos repertos furados dae Tharros, cando unu nòbile inglesu aiat fatu isfossos in su Capo San Marco iscrucullende una bintina de ipogeos pùnicos. Isse aiat bogadu a campu frunimentos de interru, fatos de orefitzeria, carrabusos, brunzos e vasàmene pretziosu.
Gennaro Pesce in su 1966 aiat apretziadu pro belle chimbe miliardos de francos su valore de sos repertos furados dae su giassu de Tharros printzipende dae su 1891, s'annu cando unu nòbile inglesu, lord Vernon, aiat fatu unos cantos isfossos in su Capo San Marco iscrucullende una bintina de ipogeos pùnicos.

Cun s'agiudu de su marchesu Boyl, chi l'aiat acasagiadu in su palatzu famadu de Mills, Vernon aiat bogadu a campu frunimentos de interru dèchidos, fatos de orefitzeria, carrabusos, brunzos e vasàmene pretziosu, gasi de balia chi aiat arrichidu non petzi sas colletziones de su British Museum de Londra, ma fintzas cussas de sos museos europeos de importu.

De aici est nàschidu su mito de sos "oros de Tharros", ispinghende sa gente a una cursa a s'oro in sa necròpoli meridionale.

Deghe annos a pustis su canònigu Giovanni Spano iscriiat:" custos isfossos fatos dae unu personàgiu distintu aiant postu fele a sos chi istaiant in sas biddas serentes, chi non bajulaiant chi sos tesoros issoro si nch'esserent andados foras de s'ìsula in manos istràngias e si fiant sortidos in su mese de abrile de su 1851 in paritzas cumpannias pro iscarrargiare.

Cosa de non crèdere paret sa manera de comente sende arrennegados, cun su pistighìngiu de nch' agatare s'oro, fiant rupidos in cussos ipogeos, moende terra, e pedras a fainu, treulende su logu, isperrende sa roca dae intro pro nche colare dae una tumba a s'àtera, in ue unu fiat mortu istrecadu.

Bi fiant prus de 500 òmines chi si fiant partzidos in sotziedades chi pro prus de tres chidas aturaiant in ie note e die faghende a gara incurende∙si de su matessi ogetu, fintzas a cando non fiat lòmpidu unu cumandu de su Guvernu pro los frimmare, e custos luego aiant postu in mente sessende de fàghere vandalismu in cussas tumbas sagradas chi petzi dae manos àbiles diant dèpere èssere tocadas.

Intertantu su trèulu e s'abbramidura de abèrrere tumbas petzi pro agatare s'oro, aiat fatu lassare tumbas sena èssere iscruculladas bene, e àteros a pustis istampadu sa terra de sas tumbas etotu, e bi nd'aiant agatadu medas carrabusos e àteros ogetos piticos in oro".

Su grandu archeòlogu sighiat descriende sa sorte de custa creze manna a beru de repertos in sos meses deretu a pustis de sos isfossos vandàlicos de Tharros:" Fiant prus de chentu sas losas chi aiant afrentadu, partzende∙si sa fura intre sos imbentores chi posca bendiant a sos Sennores de Aristanis e de sas biddas serentes a fùrriu, e una parte l'aiant giuta a Casteddu chi l'aiat comporada su tziu Cara (diretore de su Museo casteddaju) e dae mene.

Si podet nàrrere chi onni domo de biddùnculu fiat unu Museo de antighidades pro sos ogetos chi aiant assentadu in sos garrapios issoro, urnas, testos de bidru, figuras, lugheras, pratos, idoletos, cannacas, breves, armas, trastes de onni genia chi non diat a bastare unu volùmene pro los descrìere".