G. Marghinotti, Carlo Felice amparadore de sas "Bellas Artes", 1830

Giuanne Marghinotti

S'òpera prus de importu de Giuanne Marghinotti (Casteddu 1798-1865) est "Carlo Felice munifico protettore delle Belle Arti in Sardegna". Ideada e sestada in su 1829, est firmada in su 1830: sa lòmpida sua est in su matessi tempus de su tramudu de su pintore a Casteddu, in austu de su 1933 e posca remonida de su totu in su 1834 in su Palatzu de Tzitade de Casteddu.
S'òpera prus de importu de Giuanne Marghinotti (Casteddu 1798-1865) est "Carlo Felice munifico protettore delle Belle Arti in Sardegna". Ideada e sestada in su 1829, est firmada in su 1830: sa lòmpida sua est in su matessi tempus de su tramudu de su pintore a Casteddu, in austu de su 1933. In cussu annu etotu però, in su mese de santandria, est esposta a su pùblicu in su Palatzu de Maria Cristina in Torino, pro èssere posca remonida de su totu in su 1834 in su Palatzu de Tzitade de Casteddu.

Sa tela, chi est pintada cun colores a ògiu e tenet sa mannària de 300x550 cm, presentat una cumpositzione allegòrica in ue su re Carlo Felice, afurriadu dae sas figuras simbòlicas de sas virtudes suas (Paghe, Giustìtzia, Religione, Fide, Masedesa, Caridade), acollit e chistionat cun sas rapresentatziones de sas artes (Pintura, Iscultura, Architetura) introduidas dae unu gèniu aladu, sìmbolu de sa Sabidoria.

S'òpera resurtat de calidade bona a beru siat pro s'abilesa cun sa cale est risòlvida sa cumpositzione e s'organizatzione de s'ispàtziu-sunt presentes difatis batordighi figuras partzidas in duos grupos printzipales- siat pro sa finesa de sas formas, siat pro sa sensibilidade cun sa cale sunt giogados sas ogradas e sas mòidas de sos personàgios dae ue essint a manera dìliga sentimentos e meledos.

Est ladinu duncas non petzi s'influèntzia forte subra Marghinotti de sos modellos de su Setighentos in s'aderimentu in su matessi tempus a sos èsitos puristas de su neoclassitzismu, ma fintzas su sensu de s'òpera, chi, mentres serrat sa fase de s'arte in Sardigna suta su rennu de Carlo Felice, at a sighire a isparghinare sos messàgios suos de aderimentu a sa restauratzione suta cussu de Carlo Alberto.