Su ballu sardu, Nùgoro

Mùsica pro ballare

Su ballu traditzionale (su ballu sardu), galu oe impreadu meda in totu sos livellos de sa sotziedade, pro paritzas biddas est unu de sos momentos prus de importu de sa comunidade, ue s’istat paris. Finas a sa prima metade de su Noighentos,belle a s'ispissu, una festa daiat una resessida bona cunforma a comente si pesaiant sos ballos, dende atentu a sos sonos e a sas dansas.
Su ballu traditzionale (su ballu sardu), galu oe impreadu meda in totu sos livellos de sa sotziedade, pro paritzas biddas est unu de sos momentos prus de importu de sa comunidade, ue s'istat totu paris. Finas a sa prima metade de su Noighentos,belle a s'ispissu, una festa daiat una resessida bona cunforma a comente si pesaiant sos ballos, dende atentu, a manera particulare, a su chi pertocaiat sos sonos e sas dansas. In prus su ballu, fiat unu de sos momentos prus nòdidos chi sa comunidade oferiat pro sotzializare e - prus a notu - fiat su momentu in ue sa gente de sessu diferente si podiat adobiare de prus faeddende, de sos sentidos de amore issoro.
Oe chi est oe sunt paritzas sas ocasiones, formales e informales, chi faghent a manera chi si pesent sos ballos: carrasegare, festas pro su patronu, festas campinas, cojos, ispuntinos, etc. Sa sienda etnocorèutica de sa Sardigna est rica a s'etzessu, difatis in logu de faeddare de ballu sardu, diat dèpere èssere prus giustu a nàrrere ballos sardos. Ogni bidda tenet sas mùsicas suas de ballu, nessi de tres crezes diversas. A s'ispissu, cun custas mùsicas, s'ammàniant formas corèuticas chi mudant cunforma a su logu in ue si faghent sos ballos (in logu abertu o serradu) e a s'ocasione (Carrasegare, patronu, etc.). A ogni comunidade locale, duncas, sos ballos suos, diferentes meda cunforma a cuddos de sas biddas lacanàrgias o nessi gasi los creent. In paritzos casos sas diferèntzias sunt mannas meda, in àteros podent pàrrere minores, ma pro sas comunidades tenent importu mannu ca annoditant s'identidade de sa bidda e marcant sa diversidade cun sas àteras comunidades. A ogni ballu su nùmene suo chi a s'ispissu ponet a notu unu piessignu de cudda dansa: morfologia o de comente sunt sas figuras (ballu tundu, cointrotza, ballu brincu, ballu mannu, passu puntadu, ballu de sa rughe, passu de tres, etc), toponìmicu o de sos logos dae ue protzedint (logudoresa, ballu de Usache, campidanesu, ballu de su Màrghine, mamujadina, etc.), asemànticu o sena significu craru (su dillu, su dennaru, su durdurinu etc.) anatòmicu o chi ammentat su mermu de sa carena (ballu de ischina, s'ancheta, sciampita etc.), cronològicu (ballu antigu etc.), istrumentale (ballu de su sacu, ballu de s'ispigru, ballu de s'iscoba etc.).
In intro de custa sienda rica, una filera de fontes sonoras sinnat su ritmu de su ballu: su càntigu monòdicu de sa boghe maschile e de sa boghe femminile, sa polifonia vocale (tenore, cuntzertu, cuntrartu), sa boghe acumpangiada dae un'istrumentu (chiterra, organete, pipiolu, etc.). Intre sos istrumentos chi tenent in su repertòriu paritzas mùsicas de ballu podimus mentovare is launeddas, sas benas, su pipiolu, sa trunfa, s'afuente, su tumbarinu, su triàngulu, sa chiterra, su sonete a buca, su sonete, su sonu o fisarmònica. Custos istrumentos, a sa sola, acumpàngiant su ballu ma, a s'ispissu, s'aunint in cumplessos musicales minoredddos: comente cuddu formadu dae triàngulu, tumbarinu e fisarmònica semidiatònica chi sinnat sa cointrotza, su ballu tìpicu de su Carrasegare de Aidomagiore. Sa forma corèutica chi s'agatat de prus in sos ballos sardos est su de si pònnere sos balladores in tundu, inghiriende semper a manu manca. Su chircu podet èssere serradu dae sa cadena de sos balladores, abertu, partzidu in grupos o in crobas. Seriedade, òrdine, respetu, règulas sunt sas paràulas chi acostumamus a nàrrere cando faeddamus de ballu cun balladores e sonadores. Cunforma a sa traditzione, chie faghet mùsica pro ballare (sonadores o cantadores) istat in mesu de su logu impreadu pro ballare e in mesu de su ballu etotu. Su raportu intre "chie faghet mùsica"(sonadores o cantadores) e chie "gosat sa mùsica"(balladores e pùblicu) est prus ladinu cunforma a àteras formas de mùsica de traditzione orale. Sonadore e balladores relatant de sighidu, ca est semper un'adòbiu intre esecutzione musicale e corèutica. Su sonadore, pro mèdiu de pichiadas prus ritmadas, est comente chi pedat un'impignu prus mannu a sos balladores: e sos balladores etotu, moende sos pees prus a sa lestra, est comente chi pedant a su sonadore de sonare cun prus atza musicale. Sunt paritzas sas ocasiones in sas cales si podent bìdere faghende sos ballos traditzionales, in sas festas e in sas sagras ue benint a pare sos grupos de ballu. In tzertas biddas de su tzentru de Sardigna tenet importu prus mannu su tempus de carrasegare.

Bibiografia:
G. Carta Mantiglia-A.M. Tavera, Il ballo nella società tradizionale sarda. Notizie storiche e antropologiche, Ittiri, Associazione culturale e folkloristica Ittiri Cannedu-Amministrazione Comunale di Ittiri, 1994;
B. Bandinu-A. Depilano-V. Montis, Ballos, Cagliari, Frorias, 2000;
Il ballo sardo: storia, identità e tradizione, I-II, Firenze, Taranta, 2000;
M. Marras, Un paese in ballo. Danza e società nel Carnevale seneghese, Cagliari, Condaghes, 2003 (con CD-extra);
G.M. Gala, A passu. Appunti di antropologia del ballo sardo, Firenze, Taranta, 2004.