Unu momentu de importu ue sa comunidade s'aunit

Sas formas musicales in Sardigna sunt medas e diferentes: vocale, cun o sena acumpangiamentu istrumentale, medas bortas in su cuntestu de sas festas traditzionales chi previdint su ballu traditzionale (su ballu sardu) chi, pro biddas medas de s'ìsula, est unu momentu de sos prus nòdidos ue sa comunidade s'aunit.
Sas formas musicales in Sardigna sunt medas e diferentes: vocale, cun o sena acumpangiamentu istrumentale, medas bortas in su cuntestu de sas festas traditzionales chi previdint su ballu traditzionale (su ballu sardu) chi, pro biddas medas de s'ìsula, est unu momentu de sos prus nòdidos ue sa comunidade s'aunit. Faeddende de mùsica vocale s'agatant espressadas piessinnadas dae una tècnica fitiana e chircada in s'impreu sa boghe e dae una abilesa desemprada, chi est tìpica de cantadores ispetzializados a prou. Ma s'agatant finas espressadas acumpridas cun pagos sonos, pro sas cales non bi cheret cumpetèntzia manna, permitende duncas a sa majoria de sa gente de si bi pòdere apentare. Intre custos duos cabos s'agatat unu continuum prenu de cuntestos mesanos, in ue essint a campu cumbinatziones esecutivas diferentes: càntigos monòdicos femminiles o maschiles; polivocalidade e polifonias vocales ("a cappella") maschiles o femminiles (petzi a raru amesturadas); càntigos maschiles e/o femminiles cun acumpangiamentu istrumentale. Sa Sardigna tenet fintzas una sienda manna de mùsica istrumentale. Sa cajone est chi - dae unu chirru - tenet una variedade manna de istrumentos musicales, siat indìgenos siat lòmpidos dae aterue in su tempus; dae s'àteru chirru ca custos istrumentos galu in dies de oe sunt impreados a s'ispissu in ocasiones diferentes, mescamente in sas festas.