Arte comente sinnu de su potere

Pro sas potèntzias mannas de su mundu antigu sa produtzione de òperas de arte est istada una atividade semper ligada a manera astrinta cun sa pràtica de su poderiu.
Pro sas potèntzias mannas de su mundu antigu sa produtzione de òperas de arte est istada una atividade semper ligada a manera astrinta cun sa pràtica de su poderiu. Pro su chi pertenet a Roma, custu discursu est galu prus craru e forte. Roma difatis impreat sas òperas de arte comente unu istrumentu meru e sìncheru de afortiamentu de s'immàgine sua identitària siat in sa tzitade de Roma matessi siat in sas paritzas provìntzias chi a manu•a manu domaiant.
Su limbàgiu artìsticu ampru e cumplessu eleboradu dae sa Grètzia est divenidu de aici, in sas manos de Roma, unu istrumentu atzivu capatzu de agiudare sa primatzia culturale de s'imperu.

Fintzas sa Sardigna aiat connotu custu fenòmenu, comente iscumproant sas paritzas testimonias archeològicas: isculturas, pinturas, mosàicos, rilievos architetònicos, vascellas pretziadas, totu benit impreadu pro s'assimilatzione culturale forte de sa provìntzia noa.
Nointames custu, tocat de si nde sapire chi sa Sardigna no aiat pèrdidu sa màdrighe culturale cosa sua de influèntzia pùnica, chi antzis aiat mostradu de aguantare in formas prus o mancu ladinas a sa "globalizatzione" romana.
Semper e cando fintzas in Sardigna sas prus nòdidas espessadas de s'artesania artìstica fiant caraterìsticas de sas classes prus ricas presentes in s'ìsula, mancari si non mancant testimonias de un'arte “pòbera”.