Sa Regione Autònoma de Sardigna at aprovadu una lege "cornice" subra sa cultura in Sardigna a intro de sa cale est prevìdida finas sa tutela de sa limba sarda. Si tratat de sa lege de su 15 de santugaine de su 1997, n. 26: "Promotzione e valorizatzione de sa cultura e de sa limba de sa Sardigna" in vigèntzia galu oe, a sa cale sunt istadas aportadas pagas modìficas.
Oe pro sa tutela de sa limba sarda si faghet ricursu a una creze de "combinato-disposto" intre sa lege istatale 482/99 chi s'interessat mescamente de s'amministratzione pùblica e sa lege regionale 26 chi s'òcupat in màssima parte de progetos culturales.
Si podent realizare progetos isperimentales de istrutzione iscolàstica in limba sarda (o in àteras limbas o dialetos o idiomas de Sardigna) servènde·si de sas possibilidades chi dant siat sa lege regionale 26/97 siat sa lege istatale 482/99.
S'artìculu 14 de sa lege regionale 26/97 finàntziat progetos de comunicatzione chi pertocant sos mass mèdia in limba sarda. In particulare sa Regione agiudat cun contributos finantziàrios sa produtzione e sa difusione de programmas radiofònicos e televisivos.
A cumentzare dae s'annu 2002, s'est connotu in s'ìsula unu cresche·cresche de su fenòmenu de sos chi li narant "Sportelli Linguistici" chi in sardu sunt istados torrados a batigiare "Ufìtziu de sa Limba Sarda".
Sa lege regionale 26/97 tratat mescamente de sos aspetos culturales de sa difusione de sa cultura e de sa limba sarda. In custu sensu, in su primu annu de aplicatzione de sa lege s'est intervènnidu in manera particulare a favore de entes, universidades, sòtzios e finas istudiosos sìngulos.
