Antoni Mura

Antoni Mura, fìgiu de Pedru, nàschidu in Nùgoro in su 1926, rivolutzionat sa poesia sarda in su Noighentos. A pustis de sa gherra collàborat a sa rivista "Aristocrazia", ghiada dae Raffaello Marchi. Antoni faghet istùdios tècnicos chi no l'agradant, no li dant istabilidade econòmica e chi l'ant a indùere a si nch'andare a Nàpoli. A pustis emigrat in Germània in ue traballat comente operàiu in una fàbrica.
Torrat a Nùgoro in su 1951 e agatat unu traballu in s'Assòtziu de sos Cummertziantes. A parre de Duilio Caocci, "in questi anni è già un poeta maturo, ha raggiunto una sicurezza nella scrittura, che gli permette di rendere pubbliche le sue poesie". Partetzipat e binchet su "Premio Ozieri". Leat pràtichesa in sa tradutzione in sardu de paritzos poetas europeos. Intre su 1968 e su 1971 afòrtigat s'atividade sua fintzas a publicare "Su birde. Sas erbas", regorta chi l'at a cunsacrare in s'istòria de sa literadura sarda. Morit de repente in Bologna in su 1975.

A parre de Maurìtziu Virdis, in sa lìrica "Kando sor bentulerir de Venìcia", Antoni Mura "giunge ai risultati migliori, toccando vette mitopoietiche altissime, di tutto valore. È, si potrebbe dire, un contromito, o un mito in negativo e/o del negativo, antieroico, che stigmatizza la chiusura pregiudizievole dell'insularità, con originale e inusitata concezione di tale chiusura".

Su "Fenicio" de Mura, est, a parre de Virdis, s'archètipu de onni istràngiu chi ofendet sa Sardigna ca non la cumprendet. Custa "manchìtzia de amore" cambiat su mare in una muràlla chi su sardu galu non resurtat a distrùere.

ÒPERAS
Su birde. Sas erbas