Fonne, butones de oro

Gioielleria

Gioielleria

Sas prendas sunt sa parte prus de importu in sa bestimenta populare ; sa presèntzia issoro distinghet sa bestimenta de festa e tzerimoniale e s’ausèntzia issoro cussa ordinària.

Butones

In sa bestimenta traditzionale sarda siat maschile chi femminile su butone teniat funtziones diferentes: crobados, sos butones agantzaiant su tzugru de sa camisa (butones de petorra), mentres, colende in sos traucos, agantzaiant sas mànigas de su gipone a s'artària de su bussu. Una creze de butones faghiat sa butonera de sa bestimenta femminile de festa logudoresa.

Loritzinas

Chi in Sardigna sa loritzina fiat in tempos colados isparghinada meda est bastante documentadu siat dae sas regortas de ex voto e fintzas dae sos documentos de archìviu moende dae su Seschentos. Sa tipologia est ampra meda e sa prenda est presente in paritzas formas e variantes. Isparghinadu meda est su modellu a chircu in filu de arghentu o de oro.

Cannacas

In Sardigna sa cannaca est intre sos pretziados prus de importu de totu s'ammanitzu de prendas chi pertenent a sa bestimenta femminile de sa festa. Su tipu prus isparghinadu est cussu cun granos infilados in una funighedda.
Presente a fitianu in unas cantas biddas de su Logudoro est sa cannaca de coraddu ruju cun granos a pipoteddu, siat lisos chi intalliados.

Cadenas

Una cadena de prata, connota cun s'allega "gancera", fada de duos elementos a sos cabos e de una cadenìllia de collegamentu a unu o duos segmentos teniat sa tarea de agantzare unos cantos pignos de sa bestimenta maschile e femminile. Sa prenda est isparghinada siat in sa creze prus simple a cadenìllia, siat in su tipu a piastras isnodadas decorada a burinu.

Ispillas

S'ispilla est un'agiunta de sa bestimenta femminile de sa festa presente in belle totu s'ìsula mancari chi cun diferèntzia de forma, de tècnicas de traballadura e de modos de impreu; pro su prus custa prenda est fata in oro, ma non mancant finas esemplares in prata, e diferente est s'impreu issoro segundu sa localidade bidu chi est isparghinada in bona parte de sa Sardigna.

Amuletos

Sos amuletos de sa Sardigna pertenent a sas traditziones religiosas e a connoschèntzias mèigas, agràrias, mineralògicas, naturalìsticas isparghinadas meda, parte de importu de su cumplessu de sas connoschèntzias populares de s'ìsula. S'anàlisi de sos amuletos mostrat unu mundu de òmines e de fèminas chi connoschent e sunt serentes a su cumplessu de s'universu.