Sas colònias fenitzas in una carta de su de XVIII sèculos

Edade fenitza

Fenitzos in Sardigna

Cun sa lòmpida de sos Fenitzos in Sardigna, su mundu nuràgicu benit a pare deretu cun su modellu urbanu chi dae tempus si fiat impostu in su Mediterràneu. Sos datos archelògicos atestant relatziones cummertziales e culturales intre Sardos, Fenitzos e Grecos in tzentros indìgenos, comente pro su nuraghe e bidditzolu de Santa Imbènia, in Portu Conte (S'Alighera).

Su perìodu precoloniale

Sos primos sinnos de sa presèntzia Fenitza si podent agatare a cumentzare dae su de XII sèc. a.C. finas a nessi sa prima mesidade de su de VIII sèc. a.C., e pertocant a cudda fase chi si narat "precoloniale". Cun custa paràula si cheret inditare su tempus cando sos Fenitzos ant creadu cuddos aposentamentos chi sa literadura ispetzialìstica lis narat "empòrios".