Casteddu, Tuvixeddu, tumba de s'Ureu

Arte fenitzu-pùnica

Sas prendas fenitzu-pùnicas

Una de sas formas de artesania artìstica prus tìpicas de sa cultura fenitza est istada a seguru s'orefitzeria. Sas produtziones òrafas fenitzas sunt a seguru unu de sas chimas prus artas pro su chi pertenet sa calidade in totu su mare Mediterràneu de cussu tempus. Sos òrafos Fenitzos impreaiant cun abilidade manna sas tècnicas de sa filugrana e de ingranidura.

Sos oros de Tharros

Gennaro Pesce in su 1966 aiat apretziadu pro belle chimbe milliardos de francos su valore de sos repertos furados dae Tharros, cando unu nòbile inglesu aiat fatu isfossos in su Capo San Marco iscrucullende una bintina de ipogeos pùnicos. Isse aiat bogadu a campu frunimentos de interru, fatos de orefitzeria, carrabusos, brunzos e vasàmene pretziosu.

Sa necròpoli de Tuvixeddu

Sa necròpoli de Tuvixeddu est una de sas prus ampras de su Mediterràneu. Isfossada e iscrucullada giai dae s'Otighentos ma mantenet tretos ìnnidos e possibilidade de iscobertas noas de importu. Impreada giai inghitzende su de V sèculos antis de Cristos, l'aiant torrada a impitare cun tipologias de tumba diferentes fintzas a su perìodu romanu republicanu.

Sas isteles de Santu Antiogu

Sas isteles pùnicas sunt repertos chi pertenent a cussos ispàtzios sagrados chi tzèrriant "tofet", logos in ue pro tempus meda si pensaiat chi bi faghiant sacrifìtzios de pipios, mentres oe est semper prus forte sa cumbintzione chi fiant logos pro s’interru de sos pipios nàschidos mortos o mortos in sos primos annos de bida.