Cortoghiana, pratza Venètzia, 1940

Sas tzitades fundadas in su tempus de su fascismu

In su "Discorso dell'Ascensione" nòdidu (tentu in Milano in su 1927), e in un'artìculu intituladu a manera oportuna "Sfollare le città" (publicadu in su 1928), su fascismu poniat sas bases pro una polìtica de "disurbanizatzione" chi cheriat portare a contu sa crèschida urbana, ma a su matessi tempus mantènnere bìvidas sas campagnas, in unu momentu chi si presentaiat un'isbodiadura progressiva de sos insediamentos rurales.


A sa fine de su 1928 fiat istadu giai inghitzadu su provedimentu pro sa "bonìfica integrale": mandare a dae in antis su risanamentu econòmicu e sotziale de su paisu pro mèdiu de òperas pùblicas manniosas realizadas e finantziadas pro su prus dae s'Istadu e destinadas a mudare meda su territòriu italianu pro more de traballos de bonìfica, prosciugamentu, eletrificatzione, finas cun s'intentu de leare manòpera sena ispetzializatzione.

Persighende un'anàlisi atenta de sa crèschida de sas tzitades italianas de onni manera acadèssida in su "Ventennio", e de sa filera de "tzitades noas", fundadas in s'Itàlia fascista dae sa prima – Mussolìnia in Sardigna, oe Arborea (1928) – a s'ùrtima – Torviscosa (1940)- nos agatamus cara a sas contraditziones de su fascismu pro su chi pertocat su raportu intre sa tzitade e sa campagna, bantadas de borta in borta segundu su chi cumbeniat. Una polìtica, tando, non fundada subra normas de creze urbanìstica ma subra dispositziones de natura politziesca pro sa seguresa pùblica: bastat de pensare a sa mòvida forzada de famìlias intreas dae Ferrara, disposta in su 1933 pro populare sa Nurra "redenta", chi traighet su caràtere repressivu in sa cùmpuda de sos movimentos de sa populatzione, mescamente pro su chi pertocat sos chi non fiant agradèssidos. Su binòmiu tzitade-campagna (chi si podet resùmere cun sa fràsia "Si redime la terra, si fondano le città") fiat istadu cumbàtidu de badas in frontes diferentes finas pro mèdiu de leges restritivas a pitzu de s'inurbamentu, reiteradas finas a su 1939.
Sa Sardigna sighit a filu perfetu cun sa tendèntzia natzionale non feti pro sa crèschida urbana, ma finas e mescamente pro fundare sas tres tzitades noas (Mussolìnia, Fertìlia e Carbònia), chi in tempos diferentes testimòniant sa presèntzia determinante de su regime in s'ìsula, faghende chi siat una sorta de "laboratorio per l'architettura italiana".