Nùgoro, Càmera de Cummèrtziu, 1935-1938

S'architetura ufitziale

Sos fatos de sa tzitade barbaritzina, chi in su 1927 fiat divenida una "Provincia del Littorio", nos presentant in manera esemplare s'evolutzione de unu tzentru minore in una tzitade chi teniat bisòngiu de edifìtzios pùblicos de rapresentàntzia, ma finas de domos pro bìvere pro sos buròcrates noos, chi mudant in su totu sos piessinnos galu de bidda.
A su matessi tempus finas Casteddu e Tàtari fiant istadas postas in su grupu de su nùmeru mannu de sos pianos reguladores in progetu, ma mai realizados, in s'Itàlia de su "Ventennio". Difatis sa prima lege urbanìstica de s'istadu italianu fiat istada aprovada feti in su 1942 in unu paisu tando derrutu dae sa gherra, ponende torra in discussione sos paritzos pianos giai aprovados, icluidos finas sos sardos.

A su matessi tempus su fascismu erèditat unos cantos problemas sena solutzione de sa tzitade "borghese", andende dae sa contrapositzione chi s'ismànniat semper prus intre tzentru e periferia a s'atentzione majore pro s'architetura sìngula cun un'interessu iscassu pro su contestu. Sa risposta de su regime est una polìtica chi intervenit mescamente subra duos puntos: cuncursos pro sos pianos reguladores, casi semper destinados a abarrare sena fàghere e in onni manera a tesu dae s'atzione demiùrgica dada a issos; interventos de isbodiadura e ischirriadura pro sanare su tzentru tzitadinu in su chi pertocat s'igene. Sos resurtados pro su prus si repitent, comente si podet connòschere dae s'esàmene finas lestru de sos pianos produidos in cussos annos, e si basant in sustàntzia in una viabilidade chi segat sa chi giai s'agatat, isboidende o ischirriende sos edifìtzios e s'agiunta de su nou chi nde cunsighit, sena pònnere cura a su chi giai s'agataiat.