Villasimius, Fortilesa Betza, ùrtima deghina de su de XVI sèc.

Architetura militare

Comente iscrient Foiso Fois e Gianni Montaldo in sas òperas issoro subra sas turres de sa costa in Sardigna, imprentadas in su 1981 e in su 1992, su sistema de defensa de sos bidditzolos rapresentat sa risposta de sa Corona de Ispagna cara a su problema de sas incursiones barbarescas. Su fràigu de sas turres est acostagiadu difatis dae su chèrrere crèschere sa flota, pro su controllu de su mare chi incluet finas postatziones militares oru·oru sa costa nordafricana.

S'idea printzipiada dae su 1502, perìodu in su cale sos "moriscos" catzados dae Ispagna sunt acasagiados dae sas populatziones bèrberas dadas a sa corsareria e a sas bardanas, in particulare a su tràficu de sos iscraos.
Sos aparitzos postos a defensa de sa costa fiant progetados in base a ocurrèntzias territoriales a sa sola e a fortilesas prus antigas possìbiles. Non mancant sos antetzedentes istòricos: in su 1570 Laporelli aiat leadu in contu su problema pro su chi pertocaiat sos Istados Pontifìtzios, in su 1572 Camos aiat propostu unu pianu pro sa Sardigna, in su 1583 Camilliani pro sa Sitzìlia.
A pustis àere pèrdidu sa Goletta de Tùnisi, in su 1574, sa Sardigna s'agatat esposta a manera particulare, pro su fatu de èssere a curtzu meda de sa costa de su Nordàfrica, chi – tenende sos bentos a favore – fiat a una die feti de navigatzione.
S'ispinta a fraigare sas turres e a cunsolidare sas fortilesas de sa costa benit dae s'incursione chi in su 1582 càusat bardanas in unas cantas biddas (Cuartu, Cuartùciu e Pirri) a curtzu meda a Casteddu. S'annu a pustis su re de Ispagna Filipu II ponet unu dàtziu subra sas esportatziones, pro otònnere sas intradas e realizare òperas militares pro defèndere sa costa. In su 1587 est istituida sa Amministratzione Reale de sas Turres.
Comente lu narat bene Gianni Montaldo, s'istitutzione teniat su còmpitu de progetare turres noas, de nde tènnere contu de sas giai fraigadas, e de s'incuràre de agatare òmines, armas, munitziones, bivitòriu e àteru. A s'Amministratzione fiat demandadu su còmpitu de arruolare sas guarnigiones pro su controllu de totu sa costa.
Su Visurè de s'ìsula fiat a capu de s'Amministratzione de sas Turres. Fiat issu a numenare su capitanu ("alcalde") e sos artillieris, sordados, barcarolos e iscraos, a chie fiat dada sa defensa de sa turre. Custos abigiaiant die e note, pro abistare e sebestare onni barca chi acostaiat. Si resurtaiat nemigu, si depiat chircare de nche l'afundare cun mèdios de artillieria. Fogos de seguresa depiant èssere tentos semper allumados, pro su fumu impreadu pro sinnare. Pro custa resone sas turres si depiant bìdere una cun s'àtera.
S'Amministratzione Reale de sas Turres fiat istada mantenta in atividade finas a su 1842 cando fiat istada suprimida.