Santu Antiogu, su casteddu Castro in su rilievu de Della Marmora

Su "Casteddu Castro"

S'abate Vitòriu Àngius in su 1841 descriet a s'intrada de Santu Antiogu, a paga distàntzia dae su ponte romanu, sas ruinas de una fortilesa chi oe non s'agatat prus: su "Casteddu Castro" destruidu a sa fine de su sèculu pro nd'otènnere materiale pro fraigare.
In su 1860 su generale Alberto Della Marmora bidet chi sa positzione de su forte non presentaiat perunu piessinnu de sos casteddos de su Medioevu, "i quali torreggiano sulle alture isolate ed acute, mentre questo è in un piano perfetto all'imboccatura del mare".
Però sos duos istudiosos non sunt cuncordos in s'interpretatzione de s'istrutura: a parre de Àngius si diat tratare de unu casteddu giuigale, pro Della Marmora de unu casteddu àrabu. Feti in su 1907 Dionigi Scano, relevende sas diversidades de su casteddu sultzitanu respetu a sos àteros de edade giuigale, nd'afirmat s'orìgine bizantina, basende.si subra sas pagas ruinas, a pustis iscumpartas cando s'est reprenadu serente su mare a s'intrada de sa chi oe est sa bidda Santu Antiogu.
Est fàtzile meda chi su casteddu esseret istadu fraigadu a sos tempos de Giustinianu, subra sa base de sos modellos istandard chi s'impreant, cun pagas variantes, cando si fraigant fortilesas in su nord de S'Àfrica in su de VI sèculos, e basende·si subra sos piessinnos de fràigu comente sunt descritos a cuncordu dae sos tres autores de s'otighentos.
Àngius est su prus pretzisu subra su fatu: "la costruzione è in grandi pietre rozzamente quadrate, e le più d'un enorme volume. L'architrave della porta è lungo un po' più di quattro metri. Vedendosi questo fabbricato dopo osservati gli avanzi delle mura della città, si riconosce con certezza donde fu tolto il suo materiale. Le pietre non sono sempre a ordini regolari, e tra quelle che son piane vedonsene qua e là delle bugnate, che furon prese dallo zoccolo di altre costruzioni antiche. Della Marmora specifica che si trattava di pietre "porfiro trachitiche della località, che sono ben tagliate, ma si riconosce che non furono tagliate per questo edifizio, bensì tolte da altri antichi, e qua confusamente impiegate".
Importat tènnere contu de s'impreu de "materiale di spoglio", sa presèntzia de pedras traballadas a parte de foras e sa manera de torrare a impreare, chi diat pàrrere fàghere parte de sa categoria de cussu econòmicu, est a nàrrere dadu dae sa netzessidade de reduire sos costos de fràigu, chi s'oteniat fraighende cun pedras giai traballadas, prelevadas dae edifìtzios antigos, in custu casu, fàtzile meda, dae sos muros pùnicos e romanos de Sulci.
Finas sas fortilesas de su tempus de Giustinianu in Àfrica setentrionale sunt fraigadas in parte manna cun "materiale di spoglio", non feti in su casu si recùperet, adatende·la a s'impreu nou, un'istrutura preesistente, ma finas e mescamente in sos casteddos a defensa de sos tzentros de sa costa.
Procòpiu nos dat unu cuadru imponente pro su chi atenet a su programa de fortificatziones giustinianeas, cun una lista sèmplitze de custas fortilesas, medas de sas cales cunservadas in conditziones pro nde pòdere tènnere un'interpretatzione bona. Cando chi oru·oru su "limes" orientale su muru fortificadu pro su prus marcaiat su perìmetru de su logu abitadu, comente a Zenobia e a Resafa, in s'Àfrica mediterrànea su "castrum" est a banda de sa tzitade e tenet cun issa relatziones particulares, ponende·si a curtzu e a defensa de sas vias de intrada, comente a Timgad, e leende una cunfiguratzione prus regulare meda e progetada, che pare a cussa chi s'osservat in su disegnu de sa pianta e de unu tretu de sas ruinas de su Casteddu de Castro, publicados dae Della Marmora chi l'aiat visitadu in su 1821, faghende·lu rilevare cun cura.
A custa imàgine, a su presente memòria iconogràfica ùnica de su casteddu sultzitanu derrutu, nde podimus agiùnghere un'àtera, chi cumparit in un'imprenta de su de XVII sèculos, reproduida in su traballu de Filipu Pili chi atenet a su martire sultzitanu. A segus de sa figura imponente de Santu Antiogu, si bident a manu dereta su santuàriu, a manca s'istrada de intrare a sa bidda, su ponte romanu galu esistente, e su casteddu, cun turres galu cun merlos.