Fordongianus, vasca de sas termas romanas

Sas istruturas urbanas

Dae su momentu chi, in su 227 a.C., sa Sardigna fiat divènnida provìntzia romana, su protzessu de romanizatzione de s'ìsula si fiat fatu semper prus carcu, in particulare in sas tzitades, chi aiant tentu unu protzessu progressivu de rinnovamentu urbanìsticu in s'impiantu e in totu s'àmbitu edilìtziu.
Comente giai in aterue e comente at a sutzèdere galu de prus in sos tempos de s'imperu, finas in sas tzitades sardas si fiant fraigados sos edifìtzios printzipales chi in onni logu in sos domìnios de Roma marcant su modellu culturale romanu.
Fiant istados fraigados difatis teatros e anfiteatros (comente a Nora e a Karales), termas (comente a Forum Traiani, Fordongianus de oe, e a Turris Libisonis, Portu Turres de oe), templos (comente a Antas a curtzu de Frùmini Majori), acuedotos.

Fiant istadas fraigadas in campagna e oru·oru sa costa villas rurales e marìtimas in ue sos ricos possidentes si podiant interessare siat a sa compidada dereta de sos possedimentos siat a sos recreos.

Sa sistematzione de su sistema viàriu aiat domandadu sa costrutzione de istradas bonas e de pontes in pedra (comente cussuchi si podet bìdere galu oe pagu in antis de lòmpere a Santu Antiogu).
Totu custu rapresentat una testimonia de importu de sas caraterìsticas architetònicas de sa Sardigna in edade romana.