Bilartzi, crèsia tardoromànica de Santu Pedru de Zuri, 1291

Su Romànicu finale

In su 1258 sos Pisanos, chi si fiant aposentados in su montigru de "Casteddu", in Càlaris, destruint su cabu de logu giuigale de Santa Igia e faghent sessare su giuigadu de Càlaris. In su 1259, morta Adelasia sena erederis, su giuigadu de Turres lompet a sa fine. Cuddu gadduresu fiat giai rutu suta su poderiu de Pisa, duncas su giuigadu de Arborea ebbia sarbat s'autonomia.
In su 1258 sos Pisanos, chi si fiant aposentados in su montigru cramadu "Casteddu", in Càlaris, destruint su cabu de logu giuigale de Santa Igia (in sa marina ue como b'est sa laguna de Santa Gilla) e faghent sessare su giuigadu de Càlaris. S'annu in fatu Adelasia si nche moriat sena erederis e gasi finas su giuigadu de Turres lompet a sa fine. Cuddu gadduresu fiat giai rutu suta su poderiu de Pisa, duncas su giuigadu de Arborea ebbia sarbat s'autonomia. Sos àteros si los partzint paritzos donnos genovesos e mescamente pisanos. Inghitzat sa fase finale de su Romànicu sardu, in unu tempus (segunda metade de su de XIII sèculos) cando s'architetura italiana e europea fiat afilende a su limbàgiu gòticu nou. In Bonàrcadu, intre su 1242 e su 1268, s'abbatzia de Santa Maria est ismanniada, pro more de sa faina de sos mastros chi posca ant a traballare in Santu Pantaleu de Dolianova, intre su 1261 e su 1289. In su 1291 s'architetu Anselmu de Como progetat sa crèsia de Santu Pedru de Zuri, chi est s'ùrtimu fràigu nòdidu de s'architetura romànica sarda, in ue cumentzant a intrare sas formas gòticas. Custas crèsias, e àteras prus minores, prus chi pro sa novidade edilìtzia, sugùgiant interessu mannu pro sa decoradura de sas isculturas acumpridas cun cuidadu. In Bonàrcadu si podent bìdere pedutzos cun formas islongadas e finidas cun contivìgiu, in Dolianova capitellos cun iscenas de su testamentu nou o de s'Apocalisse, in Zuri una filera mera e sìnchera, in ue est rapresentadu unu fiotu de pellegrinos caminende, esempru de comente in su Medioevu europeu fiant devotos a manera fitiana.