Statueddas de dea mamma a traforu, dae Tàtari

Iscultura prenuràgica

Sas primas testimonias in Sardigna de produtos "artìsticos" sunt assentadas in su Neolìticu inferiore, cando in s'ìsula essint, in unos cantos manufatos umanos, sos primos sinnos de decoratzione "cardiales", otènnidas cun s'impreu de unu conchìgiu tzerriadu Cardium. Las agatamus a pìgiu de sas formas vascolares de cussu perìodu e de cussa cultura tzerriada "Cardiale".
Sas primas testimonias in Sardigna de produtos "artìsticos" sunt assentadas in tempos de su Neolìticu inferiore, cando in s'ìsula istupant in unos cantos manufatos umanos sos primos sinnos de decoratzione "cardiales", otènnidas cun s'impreu de unu conchìgiu tzerriadu Cardium. Las agatamus a pìgiu de sas formas vascolares de cussu perìodu e de cussa cultura tzerriada "Cardiale".
Cumentzede dae tando, sa presèntzia de sa decoratzione de sas superfìtzies de sos testos de tzeràmica at a èssere una "costante" de sas paritzas culturas preistòricas chi una in fatu a s'àtera ant a pònnere pee in terra sarda, mancari chi cada una cultura at a tènnere ischemas decorativos, tècnicas de ondradura e mannària de superfìtzies ondradas chi la distinghent.

Sos primos esempros cumpartos de "arte figurativa" sunt sas carigheddas umanas o concas de animales fatas in sas asas o in sas subrafaches de sos testos o fintzas subra manufatos de ossu. Gasi est una gragalla de ossu (sa Ucca de su Tintirriolu, Mara) ondradas, in cùcuru de manighe, cun una carighedda umana.
Galu prus a ladinu "artìsticas" parent posca sas istatueddas de "dea mama" neolìticas e eneolìticas, est a nàrrere istàtuas piticheddeddas chi mustrant figuras femminiles rapresentadas cun istiles diferentes a segunde de sa fase cronològica e culturale.
Sinnalamus in fines sos monolitos eneolìticos tzerriados pedras fitas partzidos in maschiles (cun istilete) o femminiles (cun titas).