Terranoa, tzentru cummertziale Terranova, 1996-1997

S'architetura oe

Si podet serrare sa lista de sas architeturas prus reghentes, chi leat una borta in prus su caràtere de unu sèberu intre possibilidades diferentes, cun unas cantas realizatziones chi pro resones diversas balent comente ateretantos "pezzi unici", unu pagu pro sa creze de s'edìfìtziu (cussu conventuale), unu pagu pro àere nobilitadu unu gènere a como usuradu e mescamente realizadu in sèrie (su tzentru cummertziale).
Su primu, finas in òrdine cronològicu, est su cumbentu de sas Carmelitanas, fraigadu in su montigru de Cucullìo in Nùgoro dae s'architetu Savin Couëlle, fìgiu de s'"imbentore" de sa Costa Ismeralda. Si tratat de un'interventu "plàsticu" chi modellat ambientes e volùmenes cun una libertade compositiva e un'atentu a sos particulares chi testimòngiant una creze de "artesanadu architetònicu" comente piessinnu de sos Couëlle.
Su teatru de Mario Ceroli de Porto Rotondo est sa repropositzione de su teatru antigu, e tando in logu abertu, cun una cavea e s'orchestra, ocupada dae logu pro sètzere, serrada dae unu muru in ue sas tzitatziones clàssicas sunt craras, mancari abarret su sinnu de sa manu de s'artista.
In Òlbia, pro l'acabare, su tzentru cummertziale "Terranova" est sa traspositzione materiale de unu bisu de s'artèfitze printzipale, s'architetu Aldo Rossi: su resultadu chi si podet bìdere de sas "sugestiones" de un'architetura comente cussa sarda, marcada dae sa cromia de sos materiales, medas bortas totu paris a rigas orizontales, chi mudat in su Leitmotiv de sa realizatzione olbiesa. Una "memòria" de su passadu, a s'acabu, no una còpia sua o, peus, s'imitatzione sua in un'istile "neosardu" improbàbile, chi in unu tempus pagu seguru chi pertocat non feti s'architetura ma sa bida de s'òmine, podet divenire unu puntu de apògiu, chi si podet cumpartzire o nono, comente dovere cara a su tempus benidore.