Paule, putzu de Santa Cristina, in intro de sa tholos

Sos santuàrios

A sos tempos nuràgicos, in prus a sos nuraghes medas, fiant istados costruidos àteros tipos de istruturas in pedra, intre sas cales sinnalamus, pro s'importu simbòlicu e sa calidade architetònica, cuddas destinadas a sas atividades chi atenent a su sagradu.
Sos edifìtzios sagrados realizados a sos tempos nuràgicos sunt de tres castas: sos templos a putzu, sas funtanas sagradas e sos templos a "megaron".
Sos templos a putzu sunt s'àteru tipu de istrutura realizada in edade nuràgica in ue resurtat chi s'esseret agatatadu s'impreu de sa tholos. A diferèntzia de sos nuraghes però in custu casu s'aposentu cun cobertura a tholos est ipogeu, est a nàrrere fatu suta terra. Custos edifìtzios fiant impreados pro su cultu de sas abbas, unu bene semper pretziosu in sas sotziedades antigas. Sos templos a putzu chircaiant s'abba finas a profundidades mannas.
A curtzu de unos cantos templos de importu particulare su santuàriu faghiat nàschere bidditzolos mannos de tipu "federale", interpretados comente àreas in ue si depiant tènnere adòbios periòdicos intre federales chi beniant dae logos diferentes in ocasione de festividades de importu particulare pro sa religiosidade de s'ìsula.
Finas sas funtanas sagradas teniant funtzione sìmile: in custu casu però sa falda acuìfera amparada dae s'istrutura essiat deretu dae terra.
Su de tres edifìtzios sagrados fatos in edade nuràgica est rapresentadu dae sos chi li narant tempieddos a "megaron". Su nùmene benit dae sa simigiàntzia istruturale intre custu tipu de edifìtziu e su "megaron" grecu.